Addis Ababa :- Addis Ababu Quchumi 400 kumi ali seerimalete kaarta gamba assinota Quchumu qaru Loosu massagaanchi Kalaa Xiraatu Bayyannihu egensiisino.
Kalaa Xiraatu Bayyannihu Itophiyu Pireesete Uurrinshara xawisinonte gede, Quchumu Gashshooti yannate hajo kaima asse battote widoonni uynanni hee`noonni owaante uurrinse keeshshinoonniti
qaangannite. Kuni ikkinohu korkaati seerimalete looso gargarate hasi`neeti. Baxxinohunni baatto, ijaarunna minu noonsa bissa jajjansa hi`rte xooqisatenni olaho irko assate shibbirete loosira hosiissanni Cancishaano gaamo irkissanna iillinoonni; owaante uurrinsoonnihu konniraati yino.
‹‹Gobba olu giddora e`utanna daga baala illensa olu widira qoltu woyte seerimalete doogonni baatto horra hanaffu; konne gargarate dandiisanno loossa loosate owaante aa uurrinse sa`noonni.
Ikkinohura, konne urrinse loosu harinsho buuxatenna uurrinshubba woyyeessate looso lonsoonni” yiino.
Tenne buuxatenna xiinxallate loosi giddo albi yannara attamante nooti 400 kumi ali seerimalu kaarti baalunku sinu quchumira afantinota coy`rinohu Kalaa Xiraatu, konne kaarta halaalaancho doogonni loonsoonniha ikkirono seerimalete loosi aana hosiisate ogeeyyete anganna madardariyu aana afantinore ikkansanni baalanta kaartubba hunate looso loonsoonita qummi assino.
Xa uynanniti kaartu owaante umisihu badooshshu kiiro (koodde), qorqorranniti fonuu kiiro noo kaartaati. Konni gedensaanni hasidhanno mannooti albiha kaarta amadde leelturo seerimalu kaarta ikkinota afa noonsata coy`rino.
Gobba waajjishanno oli giddo heedheenna seerimalete looso gargarate ayirrinoha ikkinota xawisinohu Loosu harisaanchi, gashshootu ga`labbote looso loosanni qoleno haammata baatto moorunninna horrasinetenni gatisa dandiinoonnita lede xawisino. Kalaa Xiraatu ledote, baattote widoonni fultanni nooti biddishubba seerimalete looso gargartanni no? woy ga`labbote bissa hattono tantano loosinsa aana jawaate beeqqaano ikkitino yaannoha badate 2013 M.Diro lame hinge odiitete looso lonsoonnita coy`rino. Quchumu Gashshooti baxxinohunni soorrote albaanni battote ledo amadante ka`anno seerimalete loossa bainchu loosi giddo e`inota huwante 2013 M.Diro umi yannara kaajjado odiitete looso assinoonni yiino.
Kalaa Xiraatu xawishshi garinni, konni 2013 M.Diro umi yannara assinoonni odiitete loosinni haammata hekitaare baatto hallanyunni horrantinota buuxate dandiinoonni. Konne kaima assine duucha looso biddi assinoonnita kulino.
Seerimalete doogonni amadantinoti 2 xibbinna 20 kumi ali baatto baattote baankera eesinoonnita kulinohu kalaa Xiraatu, xaphoomunni baattote ledo amadante noo hajo mootimmate deerrinni kaajjado looso loonsoonnita xawisino.
Albilichono, konne lawino seerimalet looso hunate dagate beeqqo luphi assatenni kaajjado looso loonsannita xawisino.
‹‹Seeru mullicho baatto dihirranni disoorrinanni yiirono, baatto hirranni hee`noonni. Konni loosi rumushsho mooshshate dagate beeqqo noowa heedheennanni quchumu gashshooti loosu amanyoote diriirse tekinoolojetenni irkisamino looso loosa hasiissanota ammanne hananfoommo loosi noo.
Konni loosi ledo tantano haaaru garinni tantanne baattote looso loossannore sase uurrinsha mittowa abbate looso loonsoonni.
“Xaphoomunni Quchumu Gashshooti baattote widoonni loonsanni seerimalete jaddo gargarate kaajje loosanni noota buuxa no’’ yiino.
Abrahaam Saamueel
Bakkalcho Ammajje 10, 2014 M.D
