Addis Ababa:- Aminesti Interinashinaale HWHT qodhaano Amaaru qoqqowira keeraano qansooti aana jaddo loosse shitenna gadadisse siyaatte hattono jajja horritinota xawissino.
Uurrinsha fushshitino ripoortenni qoqqowaho addi addi qooxeessira cancishaano HWHT gaamo keeraano daga shaatenni, gaamotenni meentonna seenne gadadisse siyaatinotanna hallanyunnihanna dagate jajja horritinota egensiisino.
Cinahonna Qobbote qooxxeessira kakkachimmatenni gumulloonniti jaddo cancishaanote gaamonni loonsoonni barshenna hilo ikkinota ripoorte caakeessitino. Cancishaanote gaamo qodhaano harunsa hasiissannonsata qara kalqete dagoomi mannihimmate qoosso wodhonna seera ginbi yite gumultinota coydhinohu Aministe Interinaashinaale Soojjatinna Jajjabbu Garbuwa Qooxeessi Layinki Dayirektere Saara jakiseniti, Amaaru qoqqowira babbaxino qooxeessira mannu ooso aana kakkachimmate loossinohu olu jaddo leellishshanno tajubba yanna yannatenni lexxanni dagginota kultanno.
Hoospiitaalete giddo nafa gadadisse seennenna meento siiyata, reeshsha kuusse mitte balera madaarte hattono jajja mittuno gatikkinni horritinota Dayirektercho kaayissino.
Amaaru qoqqowira aliidi ragira Soojjaati widoonni afamannohura Qobbo quchumira HWHT qodhaasinenna olanto, qodhaasine ikkitinokki keeraano daga aana barshenna hilo loosse shitinota xawisinohu Aminesti, Amaarunniti ga`labbote wolquwanninna teessaanotenni iillitinosi qeelama rabbisirara assino jaddo ikkitinota xawisino.
Aminesti Interinashinaale reeyishsha gamba assite madaarate kaa`litinorenna wolota 27 ikkitanno farci`raano hattono rewotenni gatte heeshshote noo daga afuu xa`mo assino.
Konninino, 10 Qobbo teessaano Aminesti Interinashinaalete kultino gede, Ammajje 9, 2014 M.Diro barri yannara cancishaanote qodhaano mini maatensanna fiixansa mininni fushshite shitino. Farci`raanchu, “Balaxxe rodoo`ya xiiyiitetenni tokkosse shitu; wole rodoo`yanna galte`ya rodoo lubbonsa gatisate xooqqanna badheenni tokkosse shitino.
Ane guracho qote`ya tokkosse qasueta rewoommoha lawe goxe goxummo” yaanni Aminesti Interinaashinaalete xawisino.
Wolootu 12 Qobbo teesaano coydhanni, Cancishaanote qodhaanonni qooxeessu teessaanonna hunkiinsanni loosidhe galtino loosaasine reeshshi haammatu qoonchoho, gagasoho, woy badhensa aana xiiyyitetenni qasantinore hattono gamu lamenta angansa badhe qolle ussuroonni reeyishsha la`inota Aminesti Interinashinaalete uytino qaalu xa`monni xawissino.
“Umi reeyishsha la`noommohu rosu mini huxxi muleeti; rosu mini hoowe giddono 20 reeyishsha mulloota mutaante calla qodhitinore la`noommo.
Haammatu reeyishshi qoonchinsa xiyyiitetenni qasaminoho. Gattinori badhensa qasantino. Xiiyyiitetenni qoonchu aana qanse shinoonniri reeyishshi ayiimma badate didandiinoonni” Yee mittu teesaanchi coy`rino.
Cinaho loonsoonniri wolu 14 diri seennenna meento Cancishaano qodhaano gamonni gadadinse siyaantoonninsa.
KO/tee jaddonna gana, shaate waajjishanna ayimmansanni kainohunni xonanna busha gede kakkachimmate looso loonsoonnita ripoorte xawissino.
Aminesti Interinashinaale hasaawissinori rewotenni gattinori 30 manni mereero 14 haammata HWHT qodhaanonni gadadinse gaamotenni siyaantoonninsatanna gamu kayinni oosonsa albaanni siyaatantinota ripoorte xawissino.
Konnininni lede, Cancishaanote gaamo lamente qooxeesubbara dagannitanna hallanyu jajjanna miinja horritinota ripoorte fushshitino.
Abrahaam Saamueel
Bakkalcho Ammajje 10, 2014 M.D
