Addis Ababa:- Gobbate deerrinni assinoonni keenonni;2014 bocu diri loosu kaayyo kalaqo luphiima gumulsha leellishshinota Sidaamu qoqqowi loosu dandoonna interpiraayizubbate latishshi biiro egensiiissu.
Loosu kaayyo kalaqate widoonni, Sidaamu qoqqowi woyyaawino deerrira noota Sa’u yannara gobbate deerrinni assinoonni keenonni buuxa dandiinoonnitaati Sidaamu qoqqowi looso kalaqatenna dandoote interpiraayizubba biiro sooreette Hageretsiyooni Abbebeti Itophiyu Pireesete uurrinshara xawissinohu.
Sidaamu qoqqowi loosu dandoonna interpiraayizubbate latishshi biiro sooreette dukko Hageretsiyon Abbebeti baxxinohunni Bakkalcho gaazeexira xawissino garinni; qoqqowu haaru garinni tantanami kawa qansootu heeshsho aana soorro abbatenninna baxxinohunni loosu kaayyo kalaqonni wole qoqqowubbanni woyyaawino garinni dancha gumulsha leellishino.
Balaxotenni looso hooggino qansoota quchumahonna baadiyete 94 kume 184 badate mixi`ne 110 kume 460 woy xibbuunni xibbe anga bada dandiinoonnita coyidhe; looso kalanqannihu Mootimmate biirora gaamatenni calla dikkino yitino.
Konni garinni giwirinnunni, industiretenni, owaantetenni, shiilotenninna qoqqowoho noo injonni quchumu giddonna baadiyete, loosunna loosaasinete bobbakkenni 46 kume 252 loosu kaayyo kalaqate mixi`ne 40 kume 499 qansooti loosu kaayyo afidhinota tittirshunni xawissino.
Qoqqowu gede tantanama mittonna jawa kaayyo ikke hee`reennanni konni albaanni loosu kaayyo kalaqo widoonni noo qarrubba garunni badatenni baalante seekitere looso assatenni loosamasino gumulshu luphiimara kaa`lo assinotano xawissino.
Loosu kaayyo kalaqo aana loosa dandiitanno sekiterubba uminsaha uurrinshu mixo asidhe loossinohura sa“i diri kawa baxxinohunnino tayixe dirira luphiima soorro dagginotano sooreette coyidhino.
Yannate assinanni harunsonna keeno hattono kalaqantanno qarrubba aana adhinanni qaafo loosu kaayyo kalaqo aana woyyaambe heedhanno gede dandiisinota; konninni sa“eno batinyunni loonsanni loosino dagoomu aana ikkasinni luphiima gumulsha abba dandiinoonnita buuxisiissino.
Dagate ledo garunni xaaddanninna mimmitu ledo sumuummetenni loosamasinni konni ragaanni assinanni qinaanbe woyyitinota ikkase danchu gumu daanno gede assinotano egensiissino.
Loosu kaayyo kalaqonni qoqqowu dancha gumulsha leellishirono qoqqowu giddo loosu hoonge kiiro luphiima ikkasinni xaano baca looso xa`mannota sooreette coyidhino.
Baxxinohunni qajeelte rosse fultino wedelli rakke tantanamate daa hoogate qarri leellamannonsaha ikkasinni hala`lado looso loosa hasiisannota coyidhino. Sartafikeete amadino qansichi qaxarama hoogummoro ditantanameemmo yaate qarri nootano coyidhe; baalanka ikka hoogirono batinyu qaxaramate hasatto noosiha ikkasinni laooshshunna dandoote aana loonsanni bacu loosi agaramannotano xawissino.
Qajeelshu islaanchimma woyyeessatenni dhuku aana illacha assine loosa hasiisannotano coyidhino. Konnirano mittu mittunku qajeelshi fonqolunni jeefisamanno gede assate loosira balaxo uynannita xawissino.
Biiro inooveeshiinenna tekinoloojete aana loossannotano coyidhe; qarra tira dandiitanno tekinolooje xiinxallotenni bade reekkisanna rosiisa biirote yawo ikkinotano buuxisiissino.
Abebech Maatewoos
Bakkalcho Ammajje 3, 2014 M.D
