Addis Ababa:- Afriku Mittimma murrichinna Senegaalete pirezidaantichi Maaki Saali Xaphoomu ministirchi Dr Abiy Ahmedihunni shiqqinoti Afriku qansooti hajubba harisannoha tuqu xaadooshshe uurrisate hedo naandannite yino.
Murrichu Afriku qansooti huuronsa ayirrisiisannohu kalqoomu tuqu xaadooshshi hasiisannotano duu’re hedosi worino.
Tayxe 35ki yannara harinsoonihu Afriku Mittimma massagaano songo gumaame ikkite gumulamaseno Senegaalete pirezidaantichinna mittimmate murrichi egensiisino.
Songo gumaame ikkite gumulantanno gede Xaphoomu ministirchi Dr Abiy Ahmedihu assino wo’naalshirano galatasi shiqishino.
Afriku mittimma murrichinna Senegaalete pirezidaantichi Maaki Saali mittimmate massagaano 35ki songo cufote amanyootira assino hasaawinni Xaphoomu ministirchi Dr Abiy Ahmedihunni shiqqinoti Afriku qansooti hajubba harisannohu kalqoomu tuqu xaadooshshe uurrisa hasiissanno yitanno hedo irkinsannitanna gumulama hasiissannota ikkase xawisino.
Afriku qansoota lainohunni kaphunni dudumbannire gargara dandiineemmohu tuqu xaadooshshuwanniiti.
Tuqu xaadooshshi widoonni Afriku hajubba kalqete ba’rera xabbe leeltannonna noo halaale meessi egensiisate dandiissannoha tuqu xaadooshshe uurrinsannitano egensiisino.
Paan-Afriku hedo bowirsitannonna 24 saate wo’ma Afriku daafira odeessitannore ficote xaawubbanna gaazeexubbano hasiissannonke yino.
Koovidi fayya taraawo yannara songo beeqqate leeltinori gobbuwate massagaanora murrichu galata shiqishino.
Mittimmate komishinerichi Musa Faaqi Muhaamatihuno isi widoonni mashalaqqe lowonta hasiissannote; Afriku hasattonna horo agarsiisannohu tuqu xaadooshshi hasiisanno.
Afriku qansooti huuronke macciishshantannonna ayirrisantanno gede assannoha kalqoomu miidiyi hasiisannonya yaanniiti coyi’rinohu.
Diilallote akati soorro, miinju xaadooshshi, fayyimma, keerunna ga’labbo Afriku qansooti aantanno qara qara ajanduwa assine jawa illacha tunge loonsannire ikkansano amadisiisno.
Amsaalu Felleqe
Bakkalcho Ammajje 3, 2014 M.D
