Addis Ababa:- Afiriku mittimma gambooshshi Addis Ababu quchumira ha’rinsanni gede assanna gumulo saysa jawa dippilomaasete loosi guma ikkinota Gobbaydi Hajo Ministeerera Ministirootu Layinki Amaalaano Dippilomaate miili xawisino.
Ministirootu Layinki Amaalaano Dippilomaatete miila ikkinohu Kalaa Eliyaasi Harisohu Bakkalcho gaazeexira uyno xawishshinni; Aliyye widoonni kaino oli korkaatinni Galchimi wolquwanna miidiyubbansa hattono mite mite Afiriku gobba, Itophiyu giddo keeru nookkita baxxinohunni Addis Ababu diinunni dooyissame no yite kaphu duduwo fincitino.
Afiriku mittimma gambooshshe Addisi Abababo harinsannikki gede assitanni keeshshitinota qaagiisse; assinoonni jawaata dippilomaasete loosinni sharrensanna xagarronsa galchine gambooshshu konne ha`ranno gede assinoonni; kuni kaajjado dippilomaasete loosi guma ikkinota xawisino.
Afiriku mittimmahu qaru borrote mini Addis Ababaho nooha ikkasinni gambooshshu konne ha`ra noosi yine kalqete deerrinni kaajjado dippilomaasete looso loonsoonnita kulinohu Dipolomaatichu Eliyaasi Harisohu; kuni gumi daanno gede mootimma calla ikkitukkinni coydhe coommite kalqete deerrinni xiiwo kalaqa dandiitanno mannootano horoonsi`ratenni dayno guma ikkinota huwachishino.
Itophiyu, Afiriku mittimma kalaqate nugusunni hanafe seeda yannara kaajjado looso loosinota kulinohu Dipolomaatichu Eliyaasi; gambooshshu konne ikkanno gede gumulo sayinse hee`neennanni kaphu duduwaasine xaano goxxinokki daafo kawiinni roorino dippilomaasete looso loosa noota huwachishino.
Afiriku mittimma gambooshshe konne harisa Itophiyaho jawa qeelle ikkitinota xawisinohu Eliyaasi; albinkunni Itophiyaho gaancenna olu hattono keeru dino yitanni kaphu dudduwo dudubbanno gobbanna bissa xa leellanni noo loosinni keerunna ga`labbo noota ammantanni dagginota kulikkinni disaino.
“Itophiyu konne gambooshshe Addisi Abababu Quchumira harisa dippilomaasete loonsoonni loosi mageeshshi geeshsha kaajjadonna jawaata ikkinota leellishanno yinohu Eliyaasi; roorenkanni Itophiyu su`mi kalqete dagoomira gotti yaanno gede assa, budesinna balchoomasi hattono wosina adhinanni amanyooteno kalqete leellishate kaayyono jawate” yino.
Afiriku mittimma gambooshshira mitte mittente Afiriku gobbanni xibbunni ajannokki manni dayee beeqqanno gambooshshe ikkinohura, qiiddinota miinju lophono gotti assatenna kakkaysate kaayyo noonke daafira tenne bilchaantetenni horoonsi`ra noota kalaa Eliyaasi Harisohu guwursino.
“Arfaasa 28 hananfe harinsanni gambooshshira qalqete miidiyinna galchimi gobbuwa illensa Itophiyu widira qoltanno yanna ikkitinota xawisinohu Eliyaasi; kaphu duduwi korkaatinni Itophiya bushu illachinni la`anni noori gattukkinni wodanansa qoltanni noo” yino.
Addis Ababu quchumi kalqete dagoomi mineeti; kalqete Niworketenna Jeneevu woy Suwizerlaandete quchummanni sufe sayikki dipolomaasetete quchumma ikkinota kulinohu Dipolomaatichu Eliyaasi, tenne kaayyo afi`noommohu Itophiyu waajjullunni kadamme gala hoogankenninna albiti gashshite sa`u nugusanno assitino kaajjado sharronni afi`noonnite yiino.
Konnira, xaano gobbaydi wolquwa angansa eesatenni eemarantinokkihura qorophanna mittimmanke kaajjishinshe albillicho sufisanna daayno wosinanno mitte mitiimma nookkiha wosinsi`ne keerunni gobbansara geegiisa noonke yiino.
Albilichono konni albaanni kalaqantinoti dipolomaasete foonqe wirro kalaqantannokki gede Gobbaydi hajo Ministire kaajjado looso loossinno daafira, togoo looso hegersine sufisatenna fiixooma halashshate xaano jawaante loonsanni hee`noonnita hawaqisino. Isinoo Moozambikete dagganno wosina mitte mitiimma nookkiha wosinsi`re geegiisate geeshsha uynoonnisiha umisiha balaxote qixxaawo assinotano kulino.
Abrahaam Saamueel
Bakkalcho Arfaasa 26, 2014 M.D Hamuse
