Addis Ababa:- Wolaphosi agarantinohanna yawosi garunni fulanno miidiya kalaqate mittimmatenni loosa hasiissannota Itophiyu tuqu xaadooshshi biilloonyi qaru dayirekterchi kalaa Mehammed Idriisihu xawisino.
Kalaa Mehammed Idrisihu Itophiyu tuqu xaadooshshi amaale mini lamu diri xaphoomu gambooshshe assi yannara assino hasaawinni xawisanni; Itophiyaho dimokiraase hala’litanno gede, dagate mittimma jawaattanno gede, dagoomittete heeshsho lexxitanno gede tuqu xaadooshshi noosi qeechi luphiimaho yino.
Tuqu xaadooshshuwa ikkadonna jawaattinore ikkituro jawaatu dagoominna jawaata mootimma kalaqantanno. Gobbankera wo’munku handaari lophonna jawaata mootimma kalaqate mereersinohunna xawadu tuqu xaadooshshi hasiisannota kalaa Mehammedi qummi assino.
Odeessaanchimmate ogimma akatooma agadha hooga, qeechu burduuqamanna labbino foonqubba leeltannohura tenne foonqubba bande taashshatenni suwashshunna yawosi fulanno miidiyi hee’ranno gede loosa baalunkuwiinni agarantannote.
Poletiku hasatto gumulsi’rate miidiyu doorsha ikka dinosi yinohu qaru dayirekterchi; dagoomittete mittimmaranna keereho guficho ikkitanno coyubba taashsha hasiissanno. Miidiyu ayee hasattono gumullanniwa ikkikkinni dagate hasattora roorsinoha ikka noosita xawisino.
Dagatenna mootimmate mereero noo buusa gatamarate hattono dagate aana leeltannota mashalaqqete foonqe wonshatenni handaaru agaranno wolaphote deerrinni loosate mittimma kalanqe irkisamatenni loosa hasiissannota qummi assino. So’rote mashalaqqe finco gatisate tuqu xaadooshshuwa qeechansa garunni fula hasiissannonsata qaru dayirekterchi huwachishinno.
Qiddist Gezaheny
Bakkalcho Arfaasa 26, 2014 M.D Hamuse
