Addis Ababa:- Saa yaa manchi beettira layinki amaati. Amate adonni aane saadate ado aganni lophannohura. Konnirano saadate ado manchi beettira heeshshosira hasiissanno shiilo baala amaddinotanna wo’ma sagale ikkasenni qoqqowoho fayyimmansa agarantino saada ado laashshinanni garinni illacha tunge loonsanni hee’noonnita Sidaamu qoqqowi saadate jiro latishshi biiro sooreessi kalaa Tekle Jombahu egensiisino.
Adote giddo pirootiine, nutirente, vaytaamine, kaarbohaydireettenna woloottano bisinkera hasiisannore amaddannohura manchi beettira duuchu garinni jawa horo afidhinota ikkasenni adote keeraanchimma agarantinota assateno saadate fayyimma garunni agarantanno gede hasiisannoha kittiwaatunna xaginaatu owante yanna agarre uynanni yino.
Manchi beetti keeraanchonna co’ichimmase agarantino ado afi’ra dandaanno gede saadate fayyimmano agarama noose yinohu kalaa Tekle; saadate fayyimma agaranturo manchi beetti fayyimmano agarantanno yino.
Saadate dhibba gargaratenni saadatewiinni mannu widira taraawanno dhibba gargarranni; konnirano saadate fayyimma agarate xagisatenni ikkikkinni kittiwaate yannatenninna garunni aatenni ikkinota coyi’rinohu sooreessu; loosidhenna ce’e galtinorino saadansa fayyimmanna laalchimmara illacha tuggaranna handaaru ogeeyye amaale garunni adhite loosu aana hosiissara agarrannitano huwachishino.
Qoqqowoho xaa yannara 2 miiliyone 962 kume ale ikkitannoti goombillu saada no; kuri giddonni 353 kume ikkannori woyyabbino saada sirchinni karsiinsoonnire ikkansanna kunino agarrannihunni xibbuunni 11 anga ikkinotanonna xawinsinohu kalaa Tekle; barru giddo 7 kume litire ado qoqqowu deerrinni laashshinannita co’ichimmase agarantino garinni horote aana hosiinsanni garinni loonsanni hee’noonnitano hattonni.
Amsaalu Felleqe
Bakkalcho Arfaasa 26, 2014 M.D Hamuse
