Addis Ababa:- 35kiti Afiriku mittimma massagaanote gambooshshe Addis Abababoho harisa kalqete dagoomira Itophiya lainohunni leellanni nooha kaphu duduwo soorrate; Itophiyunniha dancha dana kalqete leellishate jawa kaayyo kalaqannota Pirofeeser Bayyani Pheexiroosihu xawisino.
Itophiyu Sooshaalete Dimokiraase Paarte Sooreessi Pirofeeseri Bayyani Pheexiroosihu Itophiyu Pireesete Uurrinshara xawisinonte gede, Mittimmate massagaano gambooshshe Addisi Ababaho harissa kalqete dagoomira Itophiyu dana xawise leellishshate kaayyo kalaqanno yiino.
Uminsa horo agarsiisate hedde Cancishaancho HWHT irkisanni keeshshitinori gobbaydi wolqwua, Addis Ababu dana xursiisatenna su`ma hunate milli yitanni keeshshitino. Itophiyaho, jawa Afiriku mittimma geeshshi gambooshshe harisa mite mite Galchimi gobbuwa hasidhanno hasattonsa wo`mitannokkitanna hexxo mudhitanno gede assino yiino.
Kunne gambooshshe Addisi Ababu quchumira harisa kalqete dagoomi aana Itophiya la”annohunni leeltanni noota kaphu mashalaqqe soorre Itophiyunniha halaalanya dana kalqete leellishate jawa kaayyo kalaqannoha ikkinotano caakeessino.
Pirofeesri Bayyani xawishshi garinni, mootumma soorranturono Afiriku mittimma la`anno hajubba aana Itophiyaho kaajjado uurrinsha noosi. Konni albaanni Afiriku Mittimma mereershi Addis Ababunni kaysate millimillo nooha ikkirono, hattenne yannara Itophiyu assinno kaajjado sharronni Afiriku mereershi Addis Ababho noowa sufanno gede assinoonni.
Afiriku mootumma 35kiha Afiriku mittimma massagaanote gambooshshe Addis Ababho ikkanno gede huuronsanni irkisannoti agarrannita ikkitinota kulinohu Pirofeeserchu Bayyani, boode gobbuwa kayinni konne ikkannokki gede assate wo`nalturono Itophiyu haammata Afiriku gobbuwara adhamooshshunna irko noosita leellishanno yiino.
Jawanna qara ikkitino hajubba aana Itophiyu horo beeqqate yekkeeerantannori mittenna lame gobbuwa heedhurono, Itophiyu haammata Afiriku gobbanni irkisamannotanna kaa`lo noositano buuxisino.
Pirofeeseri Bayyani Pheexiroosihu, Kuni jawu Afiriku gambooshshi Addis Ababaho ikkasi Addisi Ababu keeraanchonna albi gede quqquxamanni quchuma ikkinohura kalqete dagoomi aana halalaancho mashalaqqe aanno.
Tini jawa Afiriku songo Afiriku gobbuwa massagaanota calla ikkitukkinni Afiriku gobbaanni noo gobbuwanna mootumma koysantanno. Kalqete noori miidiyubba gattukkinni songo odeessitara beeqqaano ikkitanno. Kuni baalisi konni quchumira dayee easi dipolomaasetenna polotiku soorrora hattono miinju lophora jawa kaayyo ikkinota coy`rino. Konnira, mittimmate songo Afirikaho qara quchuma ikkinohura Addis Ababaho harisate kaa`lo assitu Afiriku massagaanora jawa galata shiqisha hasiissannota qaagiissinohu Pirofeeserchu, quchumu teessaano rosantinota wosincho adhate amanyootenke garunni leellisha noonsa yee woxaratto assino.
Abrahaam Saamueel
Bakkalcho Arfaasa 26, 2014 M.D Hamuse
