Addis Ababa:- Galchimi hajajo cancishaano gaamo tantano diigatenna seera agarsiisate gaadi harancho yanna giddo jeefamanno gede assatenni luphiima qeecha fultinota Fild Maarshal Birhaanu Jula xawisino.
Hajajo sasu deerrinni Meedaaliyu baraarsha uyitinoha ikkanna; massagaano, miillanna addi addi golubba baraarsha adhitino.
Amanyootu aana afaminohu olu wolquwa xaphoomu Itaamaazhor shuume Fild Maarshal Birhaanu Jula jannootaho Meedaaliya baraarsihu gedensaanni hasaawa assino.
Hasaawisinnino galchimi hajajo olantonke aana dhagge habbannokki gano iillishshino cancishaano gaamo qara qara poletikunna qodhaanote massagaano aana qaafo adhatenna seeru hundaanni hosiisatenni seera agarsiisate gaadi harancho yanna giddo jeefamanno gede luphiima qeecha fultino hajajaanooti yino.
Baraarsha adhitinori gobba diigamatenni gatisate assitino sharronni baraarsha uynoonninsata xawisinohu Fild Maarshal Birhaanu Jula; baraarsha doorantino miillara uynoonniha ikkirono loosu kayinni baalante massagaanohonna gutu guma ikkinota huwata hasiissanno yino.
Aantino gadachorano meessaneete qixxeessa hasiissannota qummi assino.
Galchimi hajajo hajajaanchi Leetenal Jeneraal Messele Meseretihu isi widoonni; galchimi hajajo sa’u 15 agannara cancishaano gaamo badhete miqicho hiiqqate mannu wolqanni, uduunnunninna tii’’u deerrinni daafurtanno gede assitinorenna cancishaano gaamo Aliyye hajajo aana assitino xiiwo galchatenni lekkatenni seeda doogo hodhatenni uurrinshu hasatto gumulsitino hajajo ikkase coyi’rino.
Konni olinni batinye janna kalaqa dandiinoonnita, aantino gadachorano ikkado qixxaawo assinanni hee’noonnita buuxisino.
Baraarsha adhitinorino, baraarshu aantino gadachora ledote yawo macciishshantanno gede assannoha ikkasinni gobbate wolambinate agarsiisate hasiissanno kakkalo baattannota coyiransa IFEDR gargarooshshu oalnto qoolinni afi’noommo mashalaqqe leellishshanno.
Qiddist Gezaheny
Bakkalcho Arfaasa 26, 2014 M.D Hamuse
