Addis Ababa;- Itophiyu Afriku mittimma massagaano songo harissa dandaase luphiima dippilomaasete guma ikkinotanna songono hanafotenni jeefote geeshsha keerunni gumulantanno gede ikkado balaxote qixxaawo assinoonnita Mootimmate komunikeeshine owaante egensiissu.
IFDR Mootimmate komunikeeshine owaante minister Dieeta Selaamaawit Kaasiti bero uytinohu lamalate xawishshisenni; Itophiyu Afriku mittimma songo harisate dandaase luphiima dippilomaasete horo afi’rino yitino.
Ga’labbote ragaanni gobboomitte ga’labbote waaxo halante uynoonninsa sokko garunni fulate loosu giddora e’inotano xawissino.
Tenne songo Itophiyaho harissa babbaxxitinori kalqoomu tuqu xaadooshshuwa gobbanke su’ma huntanni keeshshitino garinni ikkikkinni Addis Ababu keerenna ga’labbo teessinoha ikkasinni wosinna adhine garunni koyinse geegeessate qixxaamboommore ikkanke kalqete leellishate dancha dagooti yitino.
Afriku gobbuwa roduuwanke ikkansanni Itophiyu jifo xaaduse yannara ledonke ikkitino daafirano galante geegeessate dancha tunceenya ikkinota xawissinoti minister Dieetitte Selaamaawiti; songo koronu vayrese taraawo gargadhateno hasiissanno qoropho assinannita egensiissino.
Somaalete qoqqowira ubbino moollenni honse zoonnara 960 kumi qansooti danote reqecci yitinoha ikkanna barru barrunkunni irko hasidhannori kiiro 3.3 miiliyone ale iillinota qummi assite; Wocawaaru aganinni kayse Sadaasu agani 2014M.D geeshsha noo yannara 558 kumi kuntaali ale sagale sonke tuqinsoonnitanna xaa yannarano hasiissanno sagale shiqinshanni hee’noonnita egensiissino.
Konninnino 1.7 miiliyone ale ikkanno horaameeyye ikkitinotanna kalqete sagalete pirograameno 255 miiliyone birra woxu irko assatenni qoqqowoho afantannori 311 kume ikkitanno qansootira bebbeehate balaxote qixxaawo assinoonnitano kultino.
Oromiyu qoqqowira Booranu zoonera xaaddino moolle ledo xaadinohunnino 166 kumi ale ikkitanno qansooti barru barrunkunni kaa’lo hasidhannore ikkitanna xaphooma irko hasiissannonsari kiirono 426 kume iillino.
Maaju aganinni Sadaasu 2014M.D geeshshano danote bidhatto loosu massago komishiine widoonni 69 kume kuntaala sagale iillinshe bebbeenkanni keeshshinoonni.
Wodiidi qoqqowira Wodiidi Oommo zonerano hattonni ubbino moollenni gawajjantinori 77 kumi qansooti irko hasidhannore ikkitino. Tigrayete qoqqowira sonkanniha mannimmate irkono lainohunni mootimma kalqoomu kaa’lote uurrinshuwa ledo halante loossanni keeshshitinota xawissino.
Cancishaanchu HWHT gaamo Affaarete qoqqowira wirro ola fanatenni iillishshanni noo gawajjo gargarateno gargarooshshu olanto Affaarete addi wolqa ledo ikkatenni qaafo adhitanni afantannotane ledde egensiissino.
Amsaalu Felleqe
Bakkalcho Arfaasa 26, 2014 M.D Hamuse
