Hawaasa:-2014 M.Diro 108 kumi ale ikkitanno heekitaare baatto aana laayyote looso loonsannita Sdaamu Dagoomi Qoqqowi Mootumma Giwirinnu Biiro egensiisino.
Giwirinnu Biiro Sooreessi Kalaa Mesfiini Qarrehu Bakkalcho gaazeexira uyno xawishshi garinni, tayxe 2014 M.Diro 646 loonsanni way laso aana xaphoomunni 108 kumi ali heekitaare ikkitanno baatto laayyote loosinni latisate mixo amande qixxaanbe hee`noonnita xawisino. Kalaa Mesfiini coy`ranni, tini yanna laayyotenna lasote looso loonsanni yanna ikkasenni 1.5 miliyone ali daga konni loosi aana beeqqaano ikkitanno yine hendannita kule, Konni manni giddo 3 xibbe manna ikkannohu addi addi loosi aana irkisaannorenna loonsanni uduunni bairi biddi assitannore yine geerra, amma`note massagaano, fayyimmate loosaasinenna wolootta dagate kifileno amande loosate qophaanbe hee`noonnita huwachishino.
Konnira tayxe loosira illacha assine loosate mixo amandoonnihu lee hajo aana ikkanna, isilanchonna ikadimma noohanna iibbitino dagate beeqqonni wayinna bushshu agarooshshi aana; layinkihu alichaamenna baga batidhino gobbara konni albaanni hoshooshante ba`ino baatto gideho injitanno gedenna laalchonna laalchimma lossate xarapheezaame irkene loosate hendoonnita qummi assinohu Biirote Sooreessi, qoqqowu giddo hala`ladunni afamannoha bunu laalchonna laalchimma lossate akkalino buna buqqisanna haaroonsa qoleno harishaameenna waa amada dandiitanno bale umate loosooti yiinlo.
Sufeno, Hawaasi garbanna Gidaabo kofatto aana lolahunni daanno bushshunna shaafa qooxeessaho noo woradda ledo ikkine garbu giddora eannokki gede kiatenna ittisate looso loonsannitano kulatenni. Wolu kayinni illacha tunge loosate amandoonniti haanju latishshi aanna jawaante loosate baxxinohunni duucha horo uytannota laalote muro amaddinota 3 xibbi miliyone ale ikkitanno chiginye qixxeesine kaaysate mixo amandoonnitano kalaa Mesfiino egensiisino.
Kalaa Mesfiini lede, saadate sagalera ikkitanno hayissote chiginye aanano illacha tunge loonsanniha ikkanna, konne hee`noommo Arfaasu agani giddo 23, 2014 M.Diro qoqqowu deerrinni faajjetenni hanafate qixaawote looso jeefinsanni hee`noonnita hawaqisino.
Gobbaydinni qamadenna wolu gidi eannokki gede assatenna hudenna moolle gargarate qoqqowu deerrinni 1 kumi ali heekitaare loosate mixo amande qamadete looso loonsanni hee`noonni.
Tini mixo woffi yitinohu ninke qoqqowira kuni loosi haaro ikkasinni wayinna qixxaawote anje noohuura qoleno qooxeesaho gorsu injo noo daga baala gati kayishshi aana illacha assitinohura lamu woradira yaano Hawaasi gaangaawiranna Lokka Abbaayaho 138 ikkitanno heekitaare baatto aana qamadete looso loonsoonni hee`noonni.
Albillicho konni ali heekitaare baattora qamade loosate xaanni qixxaawo assinannita Kalaa Mesfiiini qummi assino.
Waayinna laayyote loosi mittu aganira baatooshshu nookkiha loonsanni looso ikkasinni xaa geeshsha assinoonni loosinni bubbetenna xeenu soorro dagginota xawisinohu Kalaa Mesfiini, qoqqowu deerrinni faajje assinanni barra loosidhe galtino wedelli, geerrinna amuwu baalu tantanonsa garinni loosho ikkanno uduunneno amade mittimmateni fulanno gede asokkasi saaysino.
Abrahaam Saamueel
Bakkalcho Arfaasa 19/2014 M.D
