Addis Ababa:- 2014M.Dra 400 kume hektaare baatto aana qamade wixatenni 16 miiliyoone kuntaali ale laalcho afi`rate mixi`ne loonsanni hee`noonnita Giwirinnu Ministere egensiissu.
Giwirinnu ministere, giwirinnu ekisteenshine jeneraal dayirekiterchi kalaa Germaame Gaarumahu Itophiyu pireesete uurrinshara xawisino garinni; qamade gorsunni latisate millimillo sa`u sase dirrara addi illacha uyine gumullanni hee`noonni; wo`naalshunna rosichuno yanna yannatenni hala`lanni ha’rate aana afamanno yino.
Sai dirira 100 gishsha baatto latisatenni lamala miiliyone kuntaala ale laalcho afi`ra dandiinoonnita xawisinohu jeneraal dayrekiterchu; loosu Oromiyaho, Amaaraho, wodiidinna Affaarete qoqqowubbara gumulaminoho yino.
Sidaamu qoqqowirano dancha wo`naalsha assinoonnita coyi`rino. Tayixe dirirano 400 kume gishsha baatto qamadete wixinni diwate ikkado qixxaawo
assine xaa geeshsha 340 kume gishshi ale baatto diwantinotanna wixantino qamade dancha gede ikkite afantannota kalaa Germaame coyi`rino.
Konninnino gobbate giddo qamadete hasatto diwatenni gobbayidinni e`annota qamadete laalcho ajisha dandiissanno hexxo leeltinota xawisino.
Kalaa Germaame xawishshi garinni; Xaphoomu ministirchi Abiy Ahmedihunnita qamade laashshate hedo illacha tunge loonsanni hee`noonniha ikkanna qara hedosino gobbate giddoha qamadete hasatto wonshe gobbayidi dikkora shiqishate geeshsha iillannoho.
Tayixe diri laalchi gobba olu korkaatinni hoogginoha kiisate kaa`lanno; hattono mixi`noonni laalcho afi’niro gobbayidinni e`anno qamade xibbuunni 70 anga ajishate dandiisannoho yino.
Sasu diri giddo wo`munni wo`ma gobbayidinni e`anno qamade gatisate loonsannitano coyi`rino. Gobba hala`lado irshu bayicho, injiitanno diilallote gadenna way nooseta ikkasenni mixo gumaame assate toltanno ikkito noota xawisanno.
Sa’u lame dirrara loonsoonni loosinni jawaachishanno gumi leellinota coyi`rinohu jeneraal dayrekiterchu; aantete way noo basera baala latisatenni woyyino guma abba dandiinanni yino.
Tenne yannara haammata qooxeessuwara gorsunni lattino qamade gamba assa hanfoonnitanna kunino wixantino yanna garinni Ammajje agani jeefo geeshsha sufannota coyi`rino.
Sadaasunna Arfaasu agannara wixantino qamadeno labbino yannara gamba assine eessinannita egensiisino. Qamade gorsunni latisate loosi baalante qoqqowubbara hala`lanno gede illachunni loonsanni hee`noonni yinohu kalaa Germaame; Gaambeellunna Beenishaangul Gumuzete qoqqowubbara hananfoonnitanna Somaalete qoqqowira kayinni woyyino doorsha la`ne murrannita xawisino.
Abbebech Maatewoos
Bakkalcho Arfaasa 19/ 2014 M.D
