Addis Ababa:- Sudaanennihu bayira reekkote amaale mine layinki pirezidaantichi leetenaal jeneraal Mehamed Hamdaan Dagaalo tenne yannara Itophiya daasi lamente gobbuwata coimma nookki xaadooshshe biddi assate kaa`lannota gobbayidi hajo ministere qaalu sayisaanchi ambaasaadder Diina Mufti egensiisi.
Ambaasaadder Diina baxxinohunni Itophiyu pireesete uurrinshara xawisino garinni; Itophiyunna Sudaanete xaadooshshi dhaggenniho; dagate baxilli keeshshinoha ikkasinnino ale ero ikkinota kaysino.
Itophiyu widoonni xa kalaqaminoha lamente gobbuwa gibbo tira noonke yitanno uurrinsha no. Sudaanennihu bayira reekkote amaale mini layinki pirezidaantichi Itophiya towaatasino lamente gobbuwa mereero coimma nookki xaadooshshe biddi assate kaa`lo assanno yino.
Ambaasaadderchu xawishshi garinni; lamente gobbuwa daga rumuxxino xaadooshshi noonsa qarru yannara mimmitto hassannonna kaa`lantannoreeti. Sudaanennihu layinki pirezidaantichi tenne yannara Itophiya daasi xaadooshshe dachummate soorrate kaa`lanno.
Lamente gobbuwa xaadooshsheno xa noo baincho xaadooshshinni fushshate kaa`lanno yine heda dandiinanni yino. Xaadooshshe mitte hinge hananfiro sufannonna lophanni ha`rannoha ikkannotano noosi ammana coyi`rino. Batinye Itophiyu daga gobbayidi gobba fultanno woyte Sudaane fooliishshote base gede horonsidheeti
yinohu ambaasaadderchu; polotikunni, miinjunninna babbaxxitino qarrubbanni kunni albaanni gobbatenni fultanno Itophiyu dagara Sudaane fooliishshote base ikkitanni keeshshitinota qaagiisse; dagano mararaanote yee xawisino.
Sudaanenniti olantote massago loossanno loosi Sudaanete daga diriqiwanno yinanni keeshshinoommohu daga Itophiyu daga ledo danchu xaadooshshi noosehuraati; Itophiyu widoonnino xaadooshshe woyyeessate wo`naalsha assinanni hee`noonnita xawisino.
Wole widoonni muli giddo harinsanniha Afriku massagaano gambooshshe assate dancha qixxaawo assinanni hee`noonni yinohu ambaasaadderchu Diina; dagitte komite uurrinse immigireeshiinete, ga`labbote hajonna qixxaawote ledo xaadinohunni seyinohanna keeraa`mino keeshsho ikkanno gede loonsanni hee`noonni yino.
Sawudete heedhanno Itophiyu qansoota lainohunni amma`note uurrinshuwa, babbaxxitino dagoomu kifillanna afaaleeyye mannootinni doorantino riqiwaano Sawudi ha`rate viiza agadhitanni no.
Mootimma rahote tumo aate wo`naalsha assitanni no; riqiwaano Sawudi marte qarrantino qansoota gobbansa higganno gede assitannono yino. Sawudete qansootu aana iillitanno xiiwo ajishate widoonni riqiwaano qeechansa fultannotano xawisino.
Abbebech Maatewoos
Bakkalcho Arfaasa 19/ 2014 M.D
