Addis Ababa;- Itophiyaho babbaxxitinoti shiilote jiro nooha ikkanna handaarunni noonke jiro garunni latisatenni gobbanniha sufino latishsha buuxisatenna agarranni lopho widira reekkamate handaarunni jawa illacha tunge loonsanni hee’noonnita IFDR Shiilote ministere, shiilotenna Nadaajete latishshinna qorqorshi handaari minister Dieeti Kalaa Miiliyon Maatewosihu egensiisi.
Minister Dieetichu kalaa Miiliyooni baxxinohunni Itophiyu pireesete uurrinshara xawisino garinni; gobbankera sufino latishsha buuxisatenna gobba amaddinoha jireenyu widira reekkamate, shiilote latishshi handaari jawa qeecha afi’rinota xawinsino. Gobboomitte soorro abbate sa’u shoole
dirrara babbaxxitino handaarranni assinoonni soorro mereerinni miinju handaarinni worroonni onte taqqa mereerinni mitticho ikkinoha shiilote jiro garunni latinse horonsi’rateeti yinohu minister Dieetichu; aantanno tonne dirraranna albillichono gobba duuchu handaarinni jireenyu widira reekkate amandoonni mixo gumulate dandiinanni garinni handaara latinsanni hee’noonnita xawisino.
Shiilo giwirinnu latishshi, industirete, wolqatenna labbanno handaarrara kaima ikkasenni tenne jiro garunni latinse duuchunku handaarinni abbate hasiissanno lopho massagganno garinni loonsanni hee’noonnitano egensiisino.
Gobbankera seeda sannara giwirinnu loosinni hasi’noonni garinni lopho abba dandiinoonnikkita kulinohu kalaa Miliyooni; konnirano giwirinnu handaari laalchonna laalchimma lossate hasiisannoha bushshu madaabbara diru dirunkunni biiliyoone doolaare woxu fulo assinanni gobbaydinni eessinannita kule; madaabbaru laalchira ikkitannoti kalaqamu shiilo gobbankera hala’ladunni afantannohura garunni horonsi’ne bushshu madaabbara gobbate giddo laashshatenna gobbayidi fulo gatisate loonsanni hee’noonnita coyi’rino.
Shiilote ministere giwirinnu ledono dhaaddotenni xaadooshshu noosehura, handaara yannaasincho assatenninna noonketa kalaqamu gaazenna potaashe shiilo horonsi’ratenni laalchonna laalchimma lossatenni sagaletenni umonke dandaatenna hakkiinnino sae industiretenna tekinolojete handaarira hasiissanno siwiilla laashshate, wolqate hasiissannori hasatto gobbate giddo laashshate hala’lado millimillo assinanni hee’noonnitano lede huwachishino.
Konnirano mootimmate, gobbate giddonna gobbaydi dureeyye qeechansa garunni fultanno gede assatenninna gobbanke lophora waaxante loossanno garinni gobboomitte mixo qixxeessine loosu giddora e’noonnitano hattonni.
Wole widoonnino siwiilla horonsi’nikkinni industiretenna hodhishshu handaarra halashsha dandiinannikkihura diru dirunkunni biiliyoone doolaare woxu fulo assinanni gobbaydinni eessinannita qummi assinohu minister Dieetu kalaa Miiliyooni; gobbate giddo noo shiilo garunni horonsi’ne gobbate giddo laashshinanni horonsi’ratenna gobbaydinni eessinanniha siwiilu laalcho gatisateno mootimma jawa illacha tugginota egensiisino.
Amsaalu Felleqe
Bakkalcho Arfaasa 19/ 2014 M.D
