Addis Ababa:- Gedeote Daga Haaru Diru Soorro Ayyaana ‘’Daraaro’’ nna Aamanshu Ayyaana/Gumaata ayirrisa hananfoonni.
Baalle yaamamannoha budu amanyoote amadinohu Gedeote Daga Haaru Diru Soorro Ayyaani Daraaronna Aamanshu/Gumaatu Ayyaani zoonete Bulete Woradira Oda Ya’a bay’riidi songora ayirrisama hanafinoha ikkanna Gedeote daga saihu goy’rete yannara laashshidhino laalchi aaninni Abbaa Gada Daraarora uytannohanna Abbaa Gadunni maassonna babbaxxitino sokka sayinsanninsa ayyaanaati. Daraarote Ayyaani Gedeote dagoomi akkalu dirinni haaru dirira sa’’ate ayyaana ikkanna konni amanyootinnino shama daronna haqqenni qixxeessinoonni hulluuqa sa’anno.
Ayyaanu zoonete afantanno duuchante woraddara aantanno yannara ayirrisamanni keeshshannoha ikkanna kalaqamunna mannu loosino danonni gawajjantinorinna danora reqecci yitino daganke irkinsammora hasiisanno yaanni Gedeote Daga Budu Anni Abbaa Gadi Danboow Maarohu 2014M.D Daraarote Ayyaana Bulete Woradira Oda Ya’a bay’riidi songora ayirrisa hananfi yannara xawisino.
Daraaro Gedeote daga haaru diru soorro ayyaana calla ikkikkinni laashshi’noonnihu aaninni bande wolootahono uynannihanna Kaaliiqirano guweenya shiqinshanninna mittimmate ayyaanaatino yino Abbaa Gadu Damboow Maarohu.
Wo’manti zoonete dagano ayyaana ayirrissanno yannara babbaxxitino qooxeessuwara kalaqamunninna mannu kalaqino danonni gawajjantino daga irkisatenninna mittimmatenni noonsaha beeqqitanni saysa noonsatano xawisino.
Gedeote Zoone Woganna Turizimete Biddishshi Sooreessi Kalaa Yooseef Maaruhuno tenne yannara coy’ranni; Daraaro Gedeote Dagara Haaru Diru Soorronna Bay’riidi Ayyaana ikkasi kule; ayyaana latinsenna agarooshshe assinanni ilamatenni ilama tareessatenna budu jirtenna balchoomasi agarino garinni ayirrinsamanno base baalanta latisatenna egensiisate jawa illacha tunge loonsanni hee’noonnita xawisino.
‘’Daraaro baxilleho, mittimmate, keereho. Konnirano Gedeote daga wolootu gobbanke daganna dagoominte gede keerenna latishsha hasidhanno daga ikkansanni konne hundinni amadisiisame daynoha bay’riidi ayyaana budenna balchoomasi agarino garinni bowirsinanni sunfannitanna ayyaanu ayirrisama hanafamihunni kayse aantanno Lemoo barruwarano zoonete woraddara ayirrisamanni keeshshe jeefoteno zoonete deerrinni Dillu Quchumira iibbino garinni ayirrisame jeefannotano qummi assino.
Ayyaanu amanyooti aana leellinohu Wodiidi Qoqqowi Woganna Turizimete Biiro Sooreessi Kalaa Haylemaariyam Tesfayehuno isi widoonni; Gedeote daga budinna balchoomi giddonni mitto ikkinoha dubbonna kalaqamu agarooshshi kalqete dona ikke Kalqete Mootimma Rosu, Sayinsetenna Budu Uurrinshara (UNESCO)te borreessamanno gede kaajjado looso loonsanni keeshshinoonnita kule; xaa yannarano uurrinshatenni afansha agarranni hee’noonnita xawisino.
Qoqqowu mootimmano dagoomu budenna balchooma latisatenna bowirsate jawa illacha tugge loossanni nootanna gobbankera kalaqamino oli korkaatinninna mannu kalaqino danonni gawajjantino daganke harancho yanna giddo irkinseenna albi heeshshonsa hee’ra dandiitanno gedeno zoonete daganna mootimma mimmito kaa’latenna irkisate budensa kaajjishshe sufusiisa hasiissannotano huwachishino.
Amsaalu Felleqe
Bakkalcho Arfaasa 12, 2014 M.D
