Addis Ababa:- Afiriku Mittimma gambooshshe wirro Addis Ababaho assinanni gede mura Itophiyu dippoloomaasete handaarinni xaaddinose gano baala diiga dandiitannota leellishinoho yee gobbaydi hajo ministere qaalu saysaanchi Ambaasaadder Diina Muftihu egensiisi.
Ambaasaadder Diina Muftihu, baxxinohunni Itophiyu Pireesete Uurrinshara xawisino garinni; Afiriku Massagaano Afiriku Mittimma uurrinshu massagaanote gambooshshe kunni albi gede Addis Ababaho assinanni gede muransa Itophiyu dippoloomaasete handaarinni iillitinose gano baala diiga dandiitannota leellishinnoho.
Itophiyu giddo gambooshshe assa dihasiissanno yitanno hedo kayissino bissa noota coy`rinohu Ambaasaadder Diina; gambooshshe assa halaalaancho ikkinokki garinni shiqqanni keeshshitino hedo diigannota xawisino.
Itophiyu konni albaanni Afiriku Ministirootitano ikko massagaanote songo ha’rissanni keeshshitino.
Ikkollana, seeda yannara Afiriku Mittimma Borro Mini Itophiyunni fulanno gede wo`naaltino bissa noonkanni.
Yanna baala ajandinsano diigamanni keeshshino. Duuchunku aleenni Itophiyu seera agarsiisate gumultino loosi ledo amadisiisame gobbate giddo keeru dino; ga`labbo dino; ikkinohurano gambooshshe ha’risa didandiinanni yitanni keeshshitino bissara hasiissanno tumo aannoho. Gambooshshe Addis Ababaho assinanni
gede mura Itophiyu giddo ga`labbo dino yitannotenni ajandansa wirsate wo`naaltino bissaha hasatto diiginoho yino.
Ledoteno mitu mitu muli yanna geeshsha wirro wirro higge qansootinsa Itophiyunni fultanno gede wo`naalsha assitanni keeshshitino; qansootansano fushshitino gobbuwa no. Tini daga assootinsa gara ikkinokkitanna Itophiyu xaano keerunna ga`labbote giddo afantannota leellishannoho yeeno xawisino.
Gama Itophiyu kifilera gaance heedhurono batinye gobbate kifile ga`labbote giddo afantanno yinohu ambaasaadder Diina; Itophiyuno danqarantinose qarrubba qeeltanni hadhino gobbaati yino.
Xaano mittimmate gambooshshe Addis Ababaho konni albi gede ha’risate qixxaawo assa Itophiyu daggannose qarrubba baala qeeltanni sufa dandiitannota buuxisiisannoho yee xawisino.
Wole widoonni kooviidi taraawo hala`la korkaatinni Afiriku Mittimma gambooshshe gamba yine ha’risa mitiinsannoha ikke keeshshino. Hatte yanna sa`e xa Addis Ababu giddo gambooshshu massagaanote deerrinnino lede ha’risamanno gede mura miinju widoonnino uytanno horo luphiima ikkitinota coy`rino.
Wosinnu Itophiya dagganno woyte baxxinohunni hodhishshu, hoteelenna turizimete handaarino woyyitino e“o afi`rannota agarranni. Xaphooma gambooshshu gobbate su`ma ijaarsate widoonni hee`rannosi qeechi jawaho.
Ledoteno gambooshshe assa paaniAfiriikaaniizime kaajjishannota egensiisino. Itophiyu daganna Afiriku sirchi noonsa mannooti assitanni noo “ikkino” (No more) millimillo ledotenni fooleessa aanno gambooshshe ikkanno. Massagaano Afiriku ajanda fushshite Afiriku daafira amaalantannoha ikkasinni “ikkino” millimillono ledote gaacheena afidhanno yine agarranni.
Gambooshshe assate xaphoomu ministirchi Dr Abiy Ahmedihunni hanafe gobbaydi hajo ministere widoonnino luphiima sumuummenna dippoloomaaseta loossa ha’rinsanni keeshshinoonnita egensiisinohu Ambaasaadder Diina; gambooshshe seyno garinni ha’risate gobbaydi hajo ministere hasiissanno qixxaawo assitanni noota xawisino. Handaarunni uurrinsoonni komite 24 saate loosatenni babbaxxitino qixxaawo assitanni no. Itophiyu dagano rosamino garinni wosinsi’rate budinni gambooshshe dagganno wosinna adhite wosinsidhanno yine agarranni yee coy`rino.
Wole widoonni tenne Lamala giddo Itophiya daanno yine agarrannihu Haaru Ameeriku Afiriku Buudi Addi sokkaasinchi Deeviid Saaterfild lainohunni hedosi uynohu Ambaasaadder Diina; Itophiyunna Ameeriku widoonni konni albaanni assinanni keeshshinoonni amaale lainohunni wirro la`antara dandiitanno.
Tenne doogonni Itophiyu rosamino garinni wosinchose adhite geegiissitanno yino. Itophiyu hexxo assidhannohu gobbuwate xaadooshshi woyyaawannotanna konni albaanni noo huluullonna sumuummete hoonge galtanni biddi yitannotaati.
Dippoloomaasete raginke ay woyte dancha guma hedate aanaati; qooxeessahono ikko Lamente gobbuwa horora xaadooshshinke woyyaawasi hasiissannote yino. 35ki Afiriku Mittimma Uurrinshu xaphoomu gambooshshe massagaanote uurrinshu gambooshshe Arfaasa 25 /2014 M.D hananfe Addis Ababaho ha’rinsanni.
Abbebech Maatewoos
Bakkalcho Arfaasa 12, 2014 M.D
