Shambu:- Cancishaancho Shane gaamo dudubbanno piroppogaandi gaamote giddora eankera albaanni macciishshineemmohunna gaamote gidddora e`neemmo woyte gaamo loossanno loosi addintanni baxxinoho yite Cancishaanchu gaamo huluullamaano Horro Guduru Wollaggu Zoone, Guduru Woradira Kombolchu Quchumira seeru allaalshi hundaanni ikkitinori coydhino.
Itophiyu Pireesete Uurrinsha huluullamaasinete ledo xaadde hasaawissu yannara coydhinonte gede, Cancishaano gaamoha illacha buuxukkinni gaamote giddora karsamansanni dagate aana qarra kalaqqanni keeshshitinota huwachishshino.
Cancishaano gaamote miilla mereero mitto ikkinohu Gabbis Jabeessihu, teessosi Guduru Woradi giddo Gemene Gudene olliiraati; Konne seeru seejjote uurrinsha giddo hee`ne macciishshineemmo garinni Shane loosanno loosi dancha ikkinokkita xawisino.
Daga konni deerrinni gawajjasinna raateessasi hattono togooha busha assootesi amade daga gashsheemmo yaannoha ikkiro gumaamo dikkanno yino.
Bero Woyyaanete gashshooti Oromote daga aana assino gawajjo, techo qole Shane ledanni nooti lowontanni xissitinoe yinohu wedelichu, tenne dagara danchare hedeemmo yaannoha ikkiro daga qarru giddonni fushshe keerunni heedhanno gede assa dandaannonka yee xawisino.
Huluullamaanchu yaatto garinni, sharro qinittannohunna seekkannohu daga ammanchiishatenninna dagate loosate hattono dagate horo uytanno loossa gumulatenni ikkinnina, dagate aana qaafo adhatenninna dagate miinja buluulo qolatenni keeraanchimma abbinannikkita xawisino. “Dagatewiinni olu uduunne tirsiisate ha’rinshote aana hee`neenna mootimmate ga`labbote wolqa ledo assinoommo olinniiti albi`ya madirinohu.
Lame barra dubboho galeenna mootimmanniti ga`labbote wolqa affeenae seeru hundaanni higoommo yino. Mootimmate ga`labbote wolqa mitte mitiimma iillishuekkinni dancha gede assite amaddinoeta laoommo” yinohu Nejo Quchumira ilame lophinohu Eliyaas Namarihu woy sharrote su`minni Jaali Senyii yine woshshinanni huluullamaanchooti.
2010 M.D Shane miila ikke gaamote giddora karsamummo yannara illachisi konne dilawinoe yinohu Eliyaas, gaamote giddo ikkine loonseemmo loosi daga gawajjannoha ikkinota gaamote giddonni fullummo gedensaanni macciishshankenni Shane loosi bainchonna baxxinoha ikkinota buunxoommo yino.
Dagate tuqu xaadooshshi qoolira laoommohanna jaalla`ya kultinoere kaima asse gaamote giddora karsamoommo yaannohu huluullamaanchu; hakkira e`nummo gedensaanni gaamo daga gadadisse horritanninna shitanni noota la`noommo.
Caala Habitaamu kayinni Galchimi Wollaggi Zoone Inaango Woradira teessaancho ikkanni; Cancishaano gaamowa karsamara ha`ranni hee`reennaati Mootimmate ga`labbote bissanni amadaminota kulannohu. Kuni wedellichi, konni albaanni gaamote illacha sodhino doogonni huwate baxxinohunni Oromote daga keere fushshitannonna dagate loossannoho yine kullisirono, xaa yannara Shane loosanni noohu bainchu loosi Oromote daga gawajjanni noohura alba macciishshinoommohunna xa noo halaali baxxanno yee xawisino.
Jeefoteno, Wedelluno Mootimmannita keeru woshshatto adhite mootimmate angansa keerunni uytanni mootimmate agarooshshi hundaanni ikkite heeshshonsanna gobbansa uwatenni agarte, Cancishaanchu HWHT looso irkisannokki gede woshshatto assitino.
Abrahaam Saamueel
Bakkalcho Arfaasa 12, 2014 M.D
