Addis Ababa:- Itophiyu daafira kullanni kaphu duduwinni hembeelantukkinni kalqoomu daga Itophiyaho noota dhaggete ayyaanna ayirrisate e’annota cuu’’attote ayyaani aana afantinori gobbayidi gobbuwa daa’’ataano woshshatto assitu.
Kataru ayyaana Adddis Abebaho Janmeedaho ayirrissinori babbaxxitino gobbayidi gobbuwa daa’’ataano Itophiyu Pireesete Uurrinshara xawissino garinni; xa noo yannatenna gobboomu hajo aana gobbate keerunna baxillu hee’ranno gede halchonsa xawissino.
Ayyaanu aana afantino gobbayidi gobbuwa daa’’ataano mereerinni; Norweyete qansicha ikkinohu Ulvin Okborgi Itophiyu Ortodoksete amma’no harunsaanowa diru dirunkunni ayirrinsanniha cuu’’attote ayyaana aantino Onte dirrara beeqqasi coyi’rino. Itophiyu giddo xaa yannara lowo geeshsha keeru noota huwatasinna dudumbanni duduwi kaphunniha ikkasi xawisino.
Taabootta amma’note minnanni fulte amma’note harunsaanonni dukkisante dargansa iillita geeshsha noohu amma’note amanyooti lowo geeshsha hagiirsiisannoha ikkasi Olvini coyi’rino. Lizbet Guren yinanniti wole daa’’ataancho ise widoonni Norweyete kaa’looshshu amma’note mine Itophiyu Dayirektere ikkatenni soqqantanni nooha ikkanna Katarunna Cuu’’attote ayyaana diru dirunkunni ayirrisatenni sayissannota coyidhino.
Cuu’’attote ayyaani Janmeedaho baxxino suude afi’rinotanna konni ayyaani aana duucha woyte leelle ayirrisannota kulinnohu wolu Norweyete qansichi Dagfin Hoybrateni; Ortodoksete amma’nowa ayirrinsannihu cuu’’attote ayyaani Itophiyu Turizimete jirosenni dancha e’’o afidhannoha iibbado ayyaana ikkasinni konne budillaancho ayyaanira agarooshshe assatenni giddoonni noo badooshshe tiratenni keerunna baxillu hala’lanno gede wo’munku woyti halcho’yaati yaatenni hedosi wo’rino.
Tenne yannara Itophiyaho afamatenni konne ayyaana ayirrisa kaayyote gede kiirannota coyi’rannohu Dagfini; wole kalqera Itophiyu daafira kullannihu kaphu duduwinni hembeelammikkinni konne kalqete dona ikke borreessamino ayyaana beeqqa hasiissannota huwachishinno.
Qiddist Gezaheny
Bakkalcho Arfaasa 12, 2014 M.D
