Xaphoomu ministrchi woshshatto adhite gannu ayyaana gobbansara ayirrisate daggino diyaspoorooti noo injoo horonsidhe qoqqowu giddo investe assitanno gede Sidaamu Qoqqowi Investimentete Komishiine xa’mitino.
Qoqqowu Investimentete komishiine komishinerchi kalaa Zennebe Leggesehu baxxinohunni Bakkalcho Gaazeexi ledo assino hasaawinni; xaphoomu ministrchi woshshatto ha’runsite gobbansa daggino Diyaspoorooti gangalatte calla higa dinonsa; qoqqowoho noo injoo garuni huwatte jironsa fulo assite babbaxxino handaari aana bobbahatenni horonsi’raano ikka qooxeessu dagarano loosu kaayyo kalaqa hasiissannonsata huwachishinno.
Qoqqowoho investe assa hasidhanno diyaspoorootino ikko dureeyye industrete paarkuwa giddo noo injoo, loojjate, boohaarranninna gangalatu base hattono dagoomu owaante lawinori aana hattono giwirinnunna industirete laalchi loossa aana hasattonsa garinni bobbaha dandiitannota komishinerchu qummi assino.
Baxxinohunni Sidaami Qoqqowi baalanti daganna dagoomi hee’ranno qooxeessa ikkasinni ga’labbote qarri nookkihura baalunku handaari aana bobbanke loonsiro gummaa’ma dandiinanni qooxeessa ikkasino lede kaysino.
Konni gobbaanni gobbansa daggino diyaspoorooti gobbansara investe assa gobbansa, umonsanna qooxeessu daga horaameeyye assatenni aleenni xaa yannara gobbaydi gobbuwa Itophiyu aana noonsaha so’rino laooshshe soorrate luphiima kaa’lo assitannota kalaa Zennebe kaajjishe huwachishinno.
Diyaspoorootuno tenne huwatte qoqqowoho kalanqoonni injoo horonsidhe investe assitanno gede xa’mino.
Qiddist Gezaheny
Bakkalcho Arfaasa 12, 2014 M.D
