Addis Ababa:- Xaphoomu Ministirchi Dr Abiy Ahmedihu assinosi koyishshinni Itophiya daynohu Somaali Laandete Pirezidaantichi Muse Bih be’roo barra Hawaasi Industirete Paarke loosu millimillo towaanyo assino.
Pirezidaantichu, Xaphoomu ministirchi koyishshi garinni Itophiya daynoha ikkanna massagino gaamono Hawaasi Industirete Paarke loosu millimillo towwaatte la’ino.
Hawaasi Industirete Paarke Loosu Harisaanchi Kalaa Fitsum Katamihu paarkennita loosu millimillo wosinna towaatte la’anno gede assinoha ikkanna paarke Itophiyu miinju lophora assitanni nooha luphiima qeecha lainohunni hala’lado xawishshano uyno.
Somaali Laandi Pirezidaantichi Muse Bih, towaanyote yannara lainorinni hagiirraamo ikkinota coy’re paarkete giddo loonsanni hee’noonniri gobbankera jawa horonna hexxo aannore ikkasi coy’rino.
Towaanyote amanyootira IFDR Womaashshu Ministirchi Kalaa Ahmed Shidehu, Gobbaydi Hajo ministere Dieeti Redwaani Huseenihu, Sidaamu Dagoomu Qoqqowi Mootimma Pirezidaantichi Desta Ledamohu, Investimentete komishiine komishineritte Leellise Nem, Hawaasi Quchumi Kantiiwi Kaa’laanchu Pirofeeserchi Teggaaye Tukehunna wolootuno luphiima qoqqowu massagaano leeltino.
Amsaalu Felleqe
Bakkalcho Arfaasa 12, 2014 M.D
