Adiis Ababa:- ‘’Sayinseemmo gumulo baalanti Itophiya balaxissinota ikkitinota baalunku qansootinke huwattara hasiisanno; Itophiyu qansooti mittimmanke kaajjishi’nummoro kalqe baalanti halante nafa diqeeltannonke’’ yaanni Xaphoomu Ministirchi Dr Abiy Ahmedihu coy’ri.
Gobbate giddora daggino Itophiyu Diyaaspoori miillara bay’riidi mootimmate gashshooti mine hurbaate koysate amanyootira tikkeette hiratenni 800 kumi Doolaare ale eo afi’noonnitano xawinsoonni.
Tenne Lamalara bay’riidi mootimmate gashshootu mine ha’rinsoonnihu gobbate giddora gaadate biso ikkinohu eo gamba assate Diyaaspooraho hurbaate koysate amanyootira leellinohu Xaphoomu ministirchi Dr Abiy Ahmedihu xawisino garinni; ‘’Itophiyu qansooti giddoydi mittimmanke kaajjishi’nummoro kalqe baalanti halanteno diqeeltannonke; maaro aa ga’a woyyaawinoha assate ikkinnina be’ro sainore taashshate ikkinokkita duuchunku huwatara hasiisanno’’ yino.
Gobba gatamara dandiineemmohu; keerenna ga’labbo teesiinseemmohu duuchankare seekkine huwante la’’a dandiinummorooti; hiittenne yannarano ikkiro Itophiyahonna qansootisera elannoha mittimmatenni amaalamme gumulleemmo yino.
‘’Sayinseemmo gumulo baalanti Itophiya balaxissinota ikkitinohura duuchunku qansootinke konne huwattara hasiisanno; mootimma hiittenne gumulono sayissanno yannara Sase qara qara hajubba balaxisatenniiti yinohu Xaphoomu ministirchi; kunino gobboomu ayirrinye, horonna umose dandiitino gobba ikkase ikkinotano coy’rino.
Ayeeno diinankeeti yine hendeemmohu dino; duuchanka dayno garinni haa’neemmo ikkinnina gobbanke lainohunni Sasenta gobboomitte qara qara hajubba lainohunni kayinni hiittenne yannarano ayee ledono yekkeerammeemmoha di-ikkanno yaanniiti xawisinohu.
‘’Hasaambe sumuu yaatenni ammanneemmo’’ yineemmo woyte gobboomitte hajonke daafira balaxote gede worreemmori hee’reennanni kayinni yitannonkere balanxe macciishsha hasiissannonkehuraati.
Hiittenne hedono ka’annota balanxe macciishshineemmo; horo nookkita ikkituro agurreemmo; sumuu assitannonke hedo ikkituro kayinni halaalaancho dimokiraase ha’rinsho harunsineemmo yaanniiti Xaphoomu ministirchi Dr Abiy lede xawisinohu.
Diinnankeeti yineemmo gobbuwa dino; ikkollana, insa fushshitanno poolisensa ninke worreemmori gobboomitte bikkaano ledo sumuu yitannokki gobbuwa noonte gede; Itophiyu dhagge huwattannori; Itophiya ayirrissannorinna albillicho hexxose seekkite huwattano gobbuwano noota coy’rino.
‘’Hedonsa ninkete ledo sumuu yitanno gobbuwa ledo sunfeemmo; hedonsa ninkete ledo sumuu yitannokkire ikkituro kayinni so’ronsa kullanni; kadotenni galloommokkire ikkanke kullanni albillichono ayirrinyenke agarsiinse sunfeemmotanna buximanke kullanninkere ikkinummorono loonse lophineemmotanna ayirrinyinke daafira yekkeerammeemmokkire ikkinoommota afa noonsa yinanni ninke hedo widira abbineemmonsa’’ yino.
Gobbansata ayirrado woshshatto adhite dagginori Diyaaspooru miillara galata shiqishatennino gobbansa seekkite towaatte la’annonna huwattanno gede ledotenni woshshatto assinohu Xaphoomu ministirchi; latishshu ledo amadisiisaminohunnino la’’antinokki pirojektuwa la’annonna ledotenni hedonsa wortanni woyyaawino garinni loossanno gede amaalino.
Amadisiisaminohunnino bay’riidi mootimmate gashshootu mine ha’rinsoonnihu hurbaate koysate amanyooti aana tikkeette hiratenni dhaadhotenni 800 kumi Doolaare ale eo afi’noonnitano Itophiyu Diyaaspooru Ejense egensiissino.
Diyaaspooru qarru yannara gobbansa waatira uurratenni leellishshino halammeranna gobboomitte woshshattora qoltino dawarora galatinohu Xaphoomu ministirchi Dr Abiy; qansootu gobbansa woshshatto maahoyye yite adhate hanafo kaajjite sufa hasiissannotanna layinki ilama Diyaaspoorano gobbansa ledo xaadisate kaajjado buusa ikkara dandaannota xawisino.
Israeeletenna wolootu gobbuwa Diyaaspoori gobbansa lophora fultino qeecha qaagiissatennino Itophiyu Diyaaspoorino gobbansa jireenya buuxisate jawa qeecha fula hasiissanno; heedhanno gobbuwara macciishshantannonna gobbansa hajo lainohunni qeechansa lossi’rateno mittimmansa kaajjishidhe tantanama hasiissannonsatano huwachishino.
Amsaalu Felleqe
Bakkalcho Arfaasa 12, 2014 M.D
