Abbebech Maatiwoos
Intanni sagale daninna tenne sagale saga`linani saate fayyimmanke aana jawu qeechi noose. Tennenkuraati mannu itanno sagale dananna saga`lanno saate garunni huwata hasiissannonsata fayyimmate ogeeyye batinye higge seejjitannohu.
Xiinxalubbano mite mite sagalete dana hashsha intanni woyte bisoho sumuu yitannore ikkansanna woloota kayinni soodo saga`liniro fayyimmate roorenkanni dancha ikkitinota buuxxino. Konni kaiminnino mannu aantannore onte sagale hashsha saga`liro fayyimmate sumuu yitannotanna goxanono hooltannokkire ikkansa sagalete ogeeyye coydhanno.
1ki :- Waajjo Ruuze
Hashsha intanni sagalete dani giddo mitte waajjo ruuzeeti. Korkaatuno Waajjo Ruuze giddose luphiima kaalooriinete bikki noosehuranna handaaru fullahaanono tenne sagale hashsha intiro fayyimmate sumuu yitannota ikkase buuxxinohuraati.
Baxxinohunni kayinni Waajjo Ruuze giddo afantannoti luphiima bikka noose kaalooriine baxxinohunni dirunni geedhino mannita fayyimmate akata woyyeessate widoonni qeechise jawa ikkinota kullanni. Mundeete giddo afamannoha sukkaarete bikka taashshatenni mannu dancha goxicho goxanno gede assatennino kaa`litanno.
2ki :- Gafamino Dinnicha
Gafamino Dinnicha hashsha intanni sagale giddo qarunni kullanni. Korkaatuno gafamino dinnichi giddosi B6 yaamantanno shiilo amadasinninna teni shiilo goxanote macciishshamme abbatenni keeraa`mitino goxano heedhanno gede kaa`lannohuraati.
Xiinxallubbano Gafamino Dinnicha calla ikkikkinni wolootano giira kissinonsa sagalla hashsha saga`liniro dancha goxicho gonxannitanna keeraanchimmateno dancha ikkinota buuxisiissanno.
3ki :- Hardo Qulxu’me
Hardo afidhino Qulxu’meno ikkituro fayyimmate lowo horo uytannota ikkasenni hashsha intanni sagale giddo gaamantannota kullanni. Korkaatuno hardo afidhino Qulxu’me giddose seerootooni yaamantanno hormoonenna bisu macciishshamme agadhate kaa`litannore vaytaamin D nna omeega 3 faati asiide giddose amaddinohuraati.
Kuni qulxu’mete dani woloota sagalete shiilonni baraa’rinoha ikkasinni fayyimmate noosi horo luphiimanna keeraa`mitino goxanono uytanoha ikkase kullanni.
4ki :- Muuze
Muuze hashsha intanninna fayyimmate lowo geeshsha hasiissanno sagalete dani ledo gaammannite. Korkaatuno Muuze dasu tidhamanno gedenna danchu goxichi hee`ranno gede assitanno kaalsiyemenna maagniizhiyeemenni jiroo`mitinota ikkasenniti. Baxxinohunni kayinni gamaareeyyenna geerru hashsha saga`lituro keeraanchimmansa agarantannotanna dancha goxano afidhannota handaaruniti sagalete ogeeyye amaaltanno.
5ki:- Ocholoonete Guma
Ocholoonete gumi dikkoteno ikko suuqqate giddo afamanno gumaati. Hashsha sagalimmate doodhinanni sagalete dani giddo mittoho.
Ocholoonete guma hashsha intiro nigga tiratenni sae bisu dancha macciishshamme maccishshantannosi gedenna dasuno tidhamanno gede assatenni dancha goxano heedhanno gede jawa kaa`lo assanno.
Bakkalcho Arfaasa 5 / 2014
