Yaareed Geetaachew
Sa’u muli yanna giddo qoqqowu deerrinni assinoonni millimillote ba’rera xawinsoonni taje leellishshanno garinni gobbate deerrinni sa’u lame dirra giddo iillitino dano ledo heewinsiro dano xibbuunni 142 anga lexxitinota Kalaa Asaffa Fonahu Shabbadiini woradi hodhishshunna doogote latishshi borro mini sooreessi qummi asse; Lamu goommi xexxerrisinni iillitanno dano ajishate mittu mittunku animate qeecha adha hasiissanno yino. Dano diru dirunni lexxitanni nootano xawisino.
Dano lexxitanni hadhanno gede korkaata ikkinori mereerinnino ofaanchimmate ogimma ikkado ikka hooga, gongo’mishamaanote tekinikete mitiimma hee’ra, roorenkanni kayinni lamu goommi xexxerrisinni doogi-male ikkino garinni lamu manni ale ontu manni geeshsha uddeelanna bikku aleenni ikkino garinni oofa kullannireeti yino.
Xexxerrisu owaantenna horo jawa ikkiturono; barru barrunkunni mannu lubbo, bisunna jajju anna iillishshanni noo dano kayinni lexxitanni dagginota qummi assinohu kalaa Asaffi, lamu goommi xexxerrisa seera ayirrissannonna amanyoote amadisiisate loonsanni hee’noonniri hee’rirono xaano lowohu mini loosi agarannoha ikkasi kulino.
Borrote mini haja la’annonsari ga’labbotenna seeru bissa ledo halamatenni woradaho oluubbate geeshsha dirrine dagate millimillo kalaqatenninna lamu goommi xexxerrisi taje gamba assatenni taargu noorenna nookkire, hattono oofaano oofate fajjo noonsarenna oofate fajjo amaddukkinni ooffannore, hattono seeri-male kontirobaandetenni eino xexxerrisa badatenni seeru garinni millissanno gede loonsanni hee’noonnita kulinohu sooreessu, xexxerrisu ledo amadisiisaminohunni kalaqantanni noo dano akkimale ikkasenni dagoomuno hasiissanno qoropho assanno gede huwanyoote kalanqanni hee’noonnitano xawisino.
Woradaho xaa yannara taargu noorino nookkirino mootimmannitano lendeenna 1 kuminna 700 ale ikkitanno xexxerrisi noota bandoonni yinohu kalaa Asaffi, kuri giddonni gama taargu noota ikkiturono gama kayinni seeri-male ikkino garinni kontirobaandetenni e’inota ikkase qummi asse; seeri-male ikkitinota seeru garinni borreessine taargu hee’rannonsa gede assatenna seeru garinni loossanno gede assatenni dagoomunna jajju aana iillitanni noo dano gargarate illachinshe loonsanni hee’noonnitano coy’rino.
Tini yannano qooxeessaho laalchu iillinotanna hakko bikkinnino mannu woxe afi’rannota ikkasenni woxe afidhuri xexxerrisa, sasu goommi baajaajenna daamaase hidhitanni manna jilbu aleenni hogowa, kaameelu aanano taariifete aleenni baatisiisa noo daafira dagatenna haja la’annonsa bissa ledo halamatenni seeri-male assootubba gargarate loonsanni hee’noonni.
Albaanni rosaanote aanano hattonni lowo dano iillitanni keeshshitinoha ikkanna sai lamu diri kawa kayinni rosaanote tiraafiike qajeelsatenni owaante uytanno assatenni sa’u lame dirrara rosaanote aana iillitanno dano gatisa dandiinoonni. Tayxeno qorqorshunna qorophote loossa kaajjishatenni sai diro kalaqantino danonni xibbuunni 50 anga ajishate mixi’ne loonsanni hee’noonnitano qummi assino.
Bakkalcho Arfaasa 5 / 2014
