Abbebech Maatewoos
Addis Ababa:- Qansichu gede baalinke ayimma la”antannohunna buuxantannohu qarru yannara mitteenni uurratenni leellinsheemmo uurrinshanniiti yee Isliminnu Amma`no Rosiisaanchu Ustaaz Abubeker Ahmedihu xawisi.
Ustaaz Abubeker Ahmedihu baxxinohunni Itophiyu Pireesete Uurrinsha ledo assino hasaawinni, gobbate gede dagginonke jifo gutunnite. Iillitino gano gobba seeda yannara badhera higganno gede assine loonsoonni loosooti.
Tenne ha’rinsho giddo qansichu gede baalinke ayimma leeltannohunna buuxantannohu qarru yannara mittimmatenni uurratenni leelinsheemmo murci’raanchimmanniti yino.
Hagiirru yannara baalunku danchahonna baxillaanchoho yinohu Ustaaz Abubekeri; mannu baxxannohu qarru yannara ikkinota coy`rino. Jifo gutunnita ikkitinotanna sa”a dandiinannihuno mittimmatenni calla ikkinota xawisino. Gawajantino dagara gola ikkatenni diigaminoha gatamaratenni, hiiqqaminoha xagisatenni, ba”inoha latisatenni mittimmatenni anga amande gobba sufisa hasiissannota egensiisino.
Ustaaz Abubekeri xawishshi garinni, mannootu ay woyte miicammensanna mitiimmansa yannara daga qotensa uurritanno woyte kaajjillinsanna mooraalensa higganno. Ikkinohurano Itophiyu daga ayimmansanna budinsa xawishsha ikkitino halammenninna kaa`lamatenni gutunni uurritara hasiisanno. Woyyino coy widira hodhineemmo ha’rinsho sufisa baalunku yawooti yino.
Mitto ikkineemmo woyte kayinni daaynoha agurranna daaynokkihuno hedinota hedo aguranno gede assinanni ikkito giddora eanno yinohu Ustaaz Abubekeri; xa leellitanni noo mittimmano konne leellishshannota ikkitinota xawisino.
Ustaaz Abubeker cancishaano HWHT barshe daafira Itophiyu Pireesete Uurrinsha qixxeessite ha’rissanni afantannota misilete reqecco la”inoha xawisanni, amma`note minna mannu qarrunna shettote yannara caa`lannowaati. Amma`note minna diigatenni badhera higginokki wolqa, ammanaasinenna qaaqquulle siyatate uurritino wolqa wole coyeno assatenni badhera higgannokkitanna maano diigge duubbannokkita la”oommo yino.
Heeshshonsa baatte tenne gobba sufisate mundeensa dunte waaga baatte gobba reekkitanno gede assitino bareedda la’ino reqecco ikkitinotano xawisino.
Bakkalcho Arfaasa 5 / 2014
