Qiddist Gezaheny
Addis Ababa:- Tayxe laayyote latishshira 15 Miliyone ikkitanno qansooti beeqqitanno yine agarrannita giwirinnu ministere egensiissu.
Giwirinnu ministere kalaqamu jiro agarooshshinna horonsi’raanchimma dayrekterchi kalaa Tafarri Taaddesehu Itophiyu Pireesete Uurrinshara xawisino garinni, 2014M.D laayyote latishshi loosi aana haaro Wodiidi Galchimi Itophiyi Qoqqowo lede baalanti qoqqobba beeqqitanno. Baalanti qoqqobba garunni loosu giddora e’anno woyte barru barrunkunni 13 nni 15 Miliyone daga loosu aana beeqqitanno yine agarranni. Mittu manchi laayyote loosi aana beeqqannohu mitto barra calla ikkinokkihura hinge hinge kiirranni woyte 20 Miliyone ikkitanno daga beeqqitanno yine agarrannita xawisino.
Laayyote loossa laalchonna laalchimma lossate jawa qeecha afidhino yinohu kalaa Teferi; tenne yannanni bushshu hayishshame shammensa hoogginonna laalcho uytara dandiitannokki batto wirro shaqqite lattanno gede assate loossa loonsanni. Konnira bushsha amada noosi baychi bushsha, waa amada noosi baychi waa amadatenna mu’rotenni diwama noonsa qooxeessubba aana mu’ro kaasate loossa loonsannita xawisino.
2014M.D loonsanni laayyote loosinni 2.5 Miliyone hektaare baatto injeessate looso, 2.3 hektaare Miliyone baatto aana kaasate loosonna 1.8 Miliyone hektaare baatto aana konni alba loonsoonni loossa haaroonsatenna deerra lossate looso loonsanni yino.
Laayyote latishshi loossa laalchonna laalchimma lossatenni gobbaanni diilallote gade soorro agarsiisatenna Kaarboonete fincama ajishate, lolahonna moolle gargarate luphiima horo uytannota huwachishinno.
Xaa yannara loonsanni keeshshinoonnita balaxote qixxaawo loossa gumulle loosu giddora e’noonnita kalaa Tafarri xawisino.
Laayyote latishshi loosi wole olu base ikkinota qummi assinohu dayrekterchu; sagalete woowe buuxisate Itophiyano haanja assate uurrinshuwa, massagaanonna hallanyootu uminsa qeecha fultanno gede xa’mino.
Bakkalcho Arfaasa 5 / 2014
