Abbebech Maatewoos
Hawaasi quchuma turizimete mereersha assate loonsanni hee`noonnita quchumu gashshooti egensiisi.
Hawaasi Quchumi Kantiiwi kaa`laanchu pirofeesere Tseggaye Tukehu baxxinohunni Itophiyu Pireesete Uurrinshara xawisino garinni, quchumu biifadonna qalbe adhannoha ikkasi ledo amadisiisame da”ataanotenni dooramaanchoho. Konnirano Hawaasa qara turizimete mereersha assate hala`ladda loossa loonsanni hee`noonni. Baxxinohunni quchumu biinfillinna co`imma aana hala`ladunni loosate mixi`ne babbaxxitino quchumu qooxeessuwa latisatenna co`isate loossa hanafantino.
Kaa`laanchu pirofeesere Tseggaye Tuke yaanno garinni, Hawaasi Quchumi keerinna ga`labbo ammansiissanno yinannite. Konne keere agarsiisate quchumu gashshootinna qooxeessu dagoomi gutunni ikkatenni luphiimu illachinni loonsanni hee`noonni. Hawaasa da“attanno wosinna quchumaho shoolunku ragira hasidhu gede millissa dandiitannotanna quchumu keerinna ga`labbo woloota quchummara lawishsha ikka dandaannoha ikkinota coy`rino.
Kantiiwu xawishshi garinnino, owaante uynanni gara yannoonsate aanano hasiisanno garinni loonsanni hee`noonni. Wedellunnita loosu kaayyo kalaqo lossatenninna quchumunnita e“o gamba assinanni doogo woyyeessate aana illacha assine loonsanni afammanni. Konni widoonnino quchumu gashshooti 100 barri mixo gumaame assate ragaanni kaajjado guma borreessiisino.
Kaa`laanchu pirofeesere Tseggaye Tukehu yaanno garinni, Hawaasi Quchumi hee`rateno investimenteteno injiino quchuma ikkanno gede quchumu gashshooti hasiisanno garinni loosanni no. Biifado quchuma daatenni babbaxxitino handaarrara investe assa hasidhanno dureeyyera quchumu gashshooti ay woyteno waalchisi fanoho. Gobbate giddonnino ikko Itophiyu gobbaydinnino dagganno dureeyyera quchumaho hasidhanno handaarira investe assitanno gede woshshattosi saysino.
Bakkalcho Arfaasa 5 / 2014
