Qiddist Gezaheny
Addis Ababunni:- Itophiyu xaadinose qarrinni hembeelantukkinni suffanno gede Itophiyu qansootanna Itophiyu ilama ikkitino daga dippoloomaasete handaarinni mootimmate qotira uurratenni leellishshino jawaantenna mittimma kaajjishshe sufa hasiissannonsata gobbaydi hajo ministir de”eeti kalaa Redwaan Huseenihu huwachishino.
Investimentete komishiine qixxeessitinnotinna Diyaaspooru daga beeqqisiissinoti ‘’Diyaaspooru Investimentete Foreme’’ Addis Ababaho hadhino.
Ba’rete aana leellinohu gobbaydi hajo ministir de”eeti Ambaasaadderi Redwaan Huseenihu, Itophiyu xaadinose qarrinni hembeelantukkinni suffanno gede dandiissinoseti Diyaaspooru daga jawaantenna halama sufa hasiissannose yino. Diyaaspooru miilla dippoloomaasete looso aliidimmatenni, annimmatenninna jawaantetenni fulansanni mootimma riqiwe galatino.
Kalaqantino mitiimmanni Itophiyu hembeelantukkinni albaagge qaaffanno gede Itophiyu qansootinna Itophiyu ilama ikkitino daga qeechi luphiima ikkasi kayse; gaancete yannara kalaqantino guffa sa’noonniha ikkirono kiphote gedensaanni xiiwo heedhuro diyaaspooru daga leellishshino jawaantenninna halamanni mootimmate qotira uurratenni sharro jawaachisha hasiissannonsa yino.
Ambaasaadderchu xawishshi garinni, mitteenni raarrummoro macciishshammeemmo; mitteenni uurrinummoro jawaanteenno. Ledonke uurra’ne korkaatinni qaafissanno hedo noonsa bissa macciishshitanno’nenna ledo’ne uurritanno gede dandiissino’ne. sharro’ne kaajjishshine sufa hasiissanno’ne yino.
Mitteenni uurratenna macciishshamate hedo noonke daafira tittirote hajo aana buunxoommokkiri, ikkado mashalaqqe hooggunkerono badheenni la’noommokkiri, huwantoommokkirinna xawo ikkinonkekkiri xawo ikkara dandaannori danchu coy hee’ranno yine hexxo assatenni anga amadamme uurranke kaajjinshe sufa noonke yino.
Poletiku qeela dandaannohu miinju hee’rirooti; mitiimmatenni qeelle sa’’ate kaa’lamaanchimmatenni fula hasiissannonke. Diyaaspooruno callinninna gaamotenni Investimentete aana bobbaha noonsata qaagiissino.
Qeelaano ikka dandiineemmohu mittimmatenni uurra dandiinummorooti. Qeelleemmohu badooshshinkenni ledo guuqqannonke coyibba ledoonti. Konne kaajjinshe sufa hasiissannota huwachishinno.
Federaalete Investimentete Komishinercho Dukko Leellise Nemeti ise widoonni, woshshatto ayirrisse dagge foremete beeqqansanni diyaaspooru daga galatte; foreme diyaspooru gobbansara jironsa duntanno gede kaayyo kalaqqannote. Miinju jireenya buuxisate kaa’litannoteno yitinno.
Itophiyu qarrunni gobbaanni noo kaayyo, qarru gedensaanni hee’ranno jireenya, hexxo murate gedensaanni noota haaroo’mitino hexxo amaddino gobbaati’’ yino. Kaajjado heellicho aana uurritino gobba ikkase buuxisiissino gobba ikkaseno xawissino.
Sa’u Onte agannanna hakkuy ale ikkitanno yannara babbaxxitino mitiimmubba heedhurono noo mitiimmubba gobbaanni dancha hedeweelcho leeltinota qummi assino. Tenne yannara 1.34 Biiliyoone doolaare ale ikkitanno Investimente goshoosha dandiinoonnitanna kisaminokki dhuki nooseta ilamate tareessinanni jiro giddose amaddino gobba ikkaseno Dukko Leellise coydhino.
Diyaaspooru daga gobbansara investimentete handaarinni bobbakkanno gede, gobbate mayimma gatamaratenni jawaattanno gede, diyaaspooru dagginowa higganno yannara Itophiyunnita kisantinokki jiro egensiisatenni Ambaasaadderimmate qeechansa fultanno gede Dukko Leellise sokkase sayissino.
Bakkalcho Arfaasa 5 / 2014
