Abrahaam Saamueel
Addis Ababa:- Sooreessu xawishsha aanni, gobbate giddora dagginorinna dagganni noori diyaaspoorootu miillara hawalle ama gobba’nera keerunni dagginni yee; qoqqowu daganna mootimmate su`minni dancha halchosi xawisino.
Itophiya gobbansa dagge e`ino diyaaspooroota Arfaasa 7-9/2014 M.Drinni kaayse hawalle keerunni daggini yee adhara addi addi ba`re ha’risate qoqqowu hasiisanno coye baala balaxe qixxaawo asse jeefisinota sooreessu kulino.
Qixxeessinoonni battalara kalqete afaminohunni Sidaamu budi ‘Qeexaalu’ amuraatinni “Dayooe Bushshu” yine adhate feeffante hee`noonnita kulinohu kalaa Filiphoos; diyaaspooru miilla qoqqowu pirezidaantichi ledo hasaawattenni, babbaxino daa”attote baycho daa”atatenni, mittimmate ispoorte Hawaasa qixxeessinoonnitanna wolootta pirogiraameno beeqqitanno yino.
Diyaaspoorootu miilla shiqishshino xa`mo kaima assine investimentete bobbaha hasidhanno dureeyyera babbaxino handaarinni base qixxeessinoonniha ikkanna, Hawaasi Industirete Paarkeranna Yirgaalame Waaxantino Industire Paarkerano hatto maanifakicherete handaarinni bobbakkannorira qoqqowu balaxote qixxaawo asse diyaaspoorootu miilla daa calla agadhe noota xawisino.
Daanno wosini mitte mitiimma nookkiha gangalatanno gede ga`labbote looso kaajjinshe loonsoonnitanna qoqqowunniti ga`labbote milli millo coitte ikkitinota kulinohu Kalaa Filiphoos Naahoomihu, qoqqowu mootimma owaante aate handaarinni bobakkino uurrinsha ledo hasaawa assine miillate xibbunni 30% anga waaga ajinshoonniha ikkanna hodhishsha lainohunnino mootimma qixxeessitannota qummi assino.
Jeefoteno, qoqqowinke teessaano rosantino wosincho adhate amuraatenkenna Itophiyimmanke budenna balchooma agadhino garinni ayirrinyenna baxille leellishatenni teessonsa gobba hadha geeshsha baalunku qeecha`ne fultinanni gede yee sokkasi saaysino.
Bakkalcho Arfaasa 5 / 2014
