Qiddist Gezaheny
Addis Abeba:- sufo noota dagatenna gobboomu horo hedote giddo woratenni gobboomu amaale hanqafaanchimmaranna gumulora yine seerunnitanna uurrinshu ha’rinsho agarino garinni gama usuramaano kisse murantinota mootimmate xaadooshshi owaante egensiissu.
Mootimmate xaadooshshi owaante ministirchi DR Leggese Tulluhu, gobboomunna yannate hajubba aana tuqu xaadooshshuwara uyno xawishshinni; mootimma kisse kaysate mu’ro sufo noonna ammansiisanno keere halashshitanno gobboomu hanqafaanchimmanni dimokraasete amanyootinni tirate adhinoonni poletiku qaafooti.
Kissete murama lame illacha gumulsate hende gumulloonnita ikkase qummi assinohu Dr Leggese; Itophiyu giddo leellannoha dagoomittete, miinjunna poletiku qarra heewotenna poletikunni xeertirino garinni sufo noonna ammansiisanno keere buuxisara dandaanno gobboomu hanqafaancho dimokraasete amanyootinni tirate injiinoha poletiku akata kalaqa balaxo uynannita ikkase coy’rino Wowe no dimokiraase seeranna kaajjado gobboomu mittimma gatamaratenna gobboomu wolambinati mittimma danotenni gatisate yine adhinoonni poletiku qaafo ikkaseno qummi assino.
Sayinsoonni muro afi’noonni qeelle tunsiissannota ikkitukkinni suffino qeellera dancha kaayyo kalaqqannote. Tenne muro kaima assatenni ga’labbi yine buunxiro Itophiyaho woyyitinota, suffino horo buuxisate kaa’litannota, tophiyu diinna ajishshannota, olu battalara afi’noonni qeelle keeraancho bare aana lendanni gede assitannota ikkaseno coy’rino.
Gobboomu duucha beeqqisiissino amaalammera dancha poletiku injoo kalaqate yine hajote ledo xaaddino bikkantino seeru seejjamaano kisse mura hasiissannota massagaanote mereero sumiimme no yinohu Dr Leggese; federaaletenni woraddate geeshsha noo massagaanonna mootimmate loosaasine gattukkinni konni horinyi aana torbitino yino.
Dr Leggese xawishshi garinni, afi’noonni dawaro kaima assatenni bayriidi seeri biilloonyi fajjino bisi jeefote muro saysino. Bikkantino bissa calla muro sayissinohu gede assine hasaambanni hasaawi kaimu nookkiho yino.
Muro hedeweelcho ikkasenninna murote gedensaanni addi addi ikkito leellansa buuxisinohu ministirchu; mootimmate loossano ikkito gumulo gobbatenna dagate sufino keere, horo, hattono beqqi yaannokki dimokiraasete amanyoote buuxissannore ikkansa qummeessino.
Sa’u komanninna qarrubba garinni hendiro tenne lamalara sayinsi muro aana huluullo ka’’ase gara dikkitino yaa hoongirono umise mootimmate akatinni ka’’atenni daga ammanamooshshe tuga hasiissanno yino.
Kisse murroonni mannooti kipho kayissara dandiitanno yine kayinsanni bidhatto noota xawisinohu ministirchu; “mootimma kisse murtino ikkinniina kasasamaano huluullammoonninsa jaddonni keeraanote di yinoonni; kissensa taxi assinoonni bissa sa’u hunonsanni rosse woyyaabbino poletikunna dagittete kaa’lo assa dandiitanno gede kaayyo uynoonninsaha ikkino daafira, dagansanna gobbansa kiissanno yine agarranni” yaatennino huwachishino
Bakkalcho Arfaasa 5 / 2014
