Qiddist Gezaheny
Addis Ababa:- ‘’Gobbanke budinni qeelihura baraarsha qeelamiha kayinni gatona yaa dhaggenke bisooti’’ yino IFEDR Xaphoomu Ministrchi Dr Abiy Ahimedihu.
Xaphoomu Ministrchi Dr Abiy, IFEDR Gargarooshshu Ministere Qara Loosu Mini ijaara maassiinsi yannara xawisino garinni, tenne yannara albi annuwinkenni ronseemmohu worbimmatenni olamme qeela calla ikkikkinni gatona yaate ayyaaninni qeelamihura maaro assaati.
Annuwinke Itophiya wolaphotenni keeshshiishshinohu olunni calla ikkikkinni keerunnino qeelatenniiti yinohu xaphoomu ministrchi; gatona yaanna maaro assa dandaannohu duuchanka woyte qeelaancho ikkasi xawisano.
Ninke techo ilama Itophiyu ooso annuwinkenni ronseemmohu qaru coy sufo noo keere buuxisiisate worbimmatenni olamme mundee lolaanse, miqqa cancanne, lubbo kakkalle qeela calla ikkikkinni gatona yine diinaho, qeelaminohuranna anga uynohura maaro assa ikkinota huwachishinno.
Tenne lamala giddo qeelantino bissa kisse murantanno gedenna usurunni tidhantanno gede Assini woyte luphiima hanqo kalaqqino yinohu xaphoomu ministrchi; tini mu’ro Itophiya jawaata safo aana uurrissannota, sufo noo keerenna horo abbitannotanna Itophiyu diinna ajishshannota ikkase xawisino.
Olu xawo afi’noommo qeelle keeru doogonni lendeemmo gede assitannotanna annuwinke ooso ikkanke buuxissannota ikkase qaraarannanke egemminoommo halaaleeti yino. Mu’ro lainohunni mitootu qinaambetenni mitootu kayinni haja assite Itophiyu daga hembeelsate luphiima hanqo kayissanni keeshshitinota xawisino.
Mootimma qinaambetenni mayra? yite xa’mitanno bissa Itophiya baxatenni ka’e ikkinota huwattannota xawise; kuri bissa mu’ro Itophiya konninni aleenni qeelaancho assitannoseta huwata hasiissannonsata coy’rino.
Mu’ro kisse mura ikkinnina maaro ikkitinokkita qummi asse; kissensa murroonni mannooti mootimma assitinonsa maaro insara badheenni noo daga ledote giddo woratenni murroonnita ikkase affe kaayyo garunni horonsi’ra hasiissannonsata huwachishino.
Cancishaano HWHT so’ronni Lee coye rosa hasiissannota qummi asse; cancishaano amaddinoti babbaddooshshu hedo, gibbonna mooru umbete sayisse uytinonsata qummi assino. Cancishaano HWHT bainchu assootinsanni qorowantannokkiha ikkiro akkimalu qorichi agarannonsata coy’rino.
Tigirayete daga sai mittu diri giddo miinjunni, poletikunninna dippoloomaasetenni lowo geeshsha gawajjantino daga ikkase kayse; Tigirayete daga xaano ikkiro illensa fa’na hasiissannonsa yino. Itophiyaho ikkadonna mittimmanke malaate ikkitinota gargarooshshu olanto gatamara hasiissannotano xawisino.
Itophiya diingeemmo yite ka’ino wolquwa techono ikkiro Itophiyu diigantannokki gobba ikkase buuxisiisate mundeensa duntinore, miqichonsa cancantinorenna ikkado massago uytinore jawaata cigile noonsare gargarooshshu olanto miilla Itophiyu galatannonsa yino.
Bakkalcho Arfaasa 5 / 2014
