Abbebech Maatewoos
Addis Ababa:- sa`u 40 nna 45 dirrara sufinohu rosu amanyooti umbe Itophiyaho kalaqamino xaphoomu qarrira mitto korkaataati yee rosu ministerchi Pirofeeser Birhaanu Negga coy`ri.
Rosu ministere baalankawa Itophiyaho 50 yannaasine deerransa agartino gallanni ronsanni rosu minna gatamaarsate Itophiyu Arkiteektootu Maamari ledo hasaawa ha’rissino.
Yannate rosu ministerchi Piroofeeser Birhaanu Neggihu interneetetenni saysino sokkanni, xaaddinonke jiffara mittu korkaati rosu amanyooti umbeeti yee coy`rino.
Yannate ledo ha`ranno roso konni albaanni diuynoonni. Kunino xa kalaqamino gobboomu qarrira mitto korkaata ikkino yino.
Rosu minnata islaanchimma la“a dandiiniro nafa baalankawa Itophiyaho 48 kume rosu minna heedhurono deerransa agartinori kayinni xibbuunni 0.01 callaho yee xawisino.
Xaphooma deerra shoolu aana afantanno rosu minna lee callate. Insano ikkituro rosiissannonsa ooso 12ki kifile fonqolo adhitukkinniti gobbaydi gobbuwara ha`rate
wodaninsa ka“annohu yino.
Gattinori 99 xibbuunni Itophiyu rosaano rossannohu deerrinsa woroonni ikkitinonna rosu mineeti yine woshshate dandiisanno deerri noonsakki uurrinshuwa giddooti. Togoo uurrinshuwa giddo rossino wedelli jeefonsa maa ikkitara dandiitannoro heda diaayirritanno yee huwachishino.
Konni daafira deerransa agartino rosu minna heedharanna qaaquullu hasiissannota bisunna buqqeete lopho afidhanno gede assa gadachaho. Konnirano aantaano onte dirrara loosu aana hossara dandiitanno deerransa agartino rosu minna haaro gede ijaarsa hasiissannonke yino.
Piroofeeser Birhaanu xawishshi garinni, rosu minnano su`maho calla ijaarsinannire ikkitukkinni hasiissanno labraatoorete, co`ichimmate, teknoloojetenna woleno kalqoomi deerra wonshitinore ikka noonsa.
Konnira 50 gallanni ronsanni rosu minna ijaarsha yine pirojekte qixxeessinoonni. Rosu minnata dizzayne qixxeessateno Itophiyu Arkiteektooti Maamari ledo hasaawa assinoonni. Itophiyu Arkiteektooti dizzaynete looso fajjotenni gumulate ka“ansanni galata shiqishino.
Tenne labbanno pirojektuwa halashshatenninna ledote rosu isilaanchimma loossa gumulatenni wirro rosu amanyooti uwinowiinni ka“anno gede assa dandiineemmo yaatenni ministerchu coy`rino.
Rosu amanyooti wirro muqaaqanno gede dandiissanno hanafote loossa no. konne kaajjinshe sunfummoro gobbate gede guma abba dandiineemmo. Konnirano rosu minna isilaanchimmara, ijaarahonna labbanno loossara babbaxxitino ogimmate maamara ledo kaa`lamme loonsanni yino.
Itophiyu Arkiteekitooti Maamari Pirezidaante Arkiteekiti Amaanueel Teshoomehu isi widoonni xawisino garinni, pirojektennita xaphooma qixxaawo lainohunni rosu ministere massagaano ledo hasaawa assino.
Rosu minna ijaarira ikkitanno dizzayine qixxeessate xaa geeshsha 20 meddi yitanno arkiteekitooti balaxote qixxaawo assitanni no. Aanteteno haammatu beeqqanno yine agarranni yino.
Bakkalcho Sadaasa 28/ 2014
