Amsaalu Felleqe
Addis Ababa:– Bisu jallaaganno gede qansanni xagicho qasummo yee mooshshe aguranno xagicho qasannohu fayyimmate ogeessi kalaqama dinosi yaanni rosunna qajeelshu biilloonyi dayrekterichi Dr Andualem Admaasehu xawisi.
Fayyimmate rosi deerri qixxaawasi handaarunni kalaqamanni keeshshinoha isilanchimmate qarra tirannotano qummi assinoonni.
Dr Andualem Admaasehu fayyimmate rosi afanshu fajjo aate isilanchimmate deerra lainohunni qeechu noonsa bissa ledo assinoonni hasaawi yannara coy’ranni, fayyimmate rosi isilanchimma deerri qixxaawasi mootimmannihano ikko hallanyu fayyimmate uurrinshuwa deerransa agartinore ikkitanno gede dandiissanno.
Qaru dayrektrerichi xawishshi garinni, biso darre gomba geeshsha woy xaginse ka’na geeshsha biso jallaagisanno xagicho qasummo yee roorenkanni mooshshe aguranno xagicho qasannohu fayyimmate ogeessi kalaqamara dihasiisanno. Fayyimmate rosi isilanchimma deerra yine hananfi ikkinnina jawa hajo duuchante ogimmate handaarra halante loosatenni rosu isilanchimma buuxisate ogimmate maamarra ledo mittimmatenni loosatenni gobbanke jireenya gotti assa dandiinanni yino.
Biilloonyu, rosu isilanchimma agarsiisate uyinoonnisi biilloonyi mereerinni afanshu fajjo aa mittete. Illacha tungoonnihuno wirro afi’ra dandiinannikkita manchi beetti lubbonna fayyimma agara dandiinannihu egennotenninna ogimmatenni ikkado ikkinohu fayyimmate ogeessi kalaqamirooti. Tini mixo guuta ikkino garinni gumulantanno gede lamala fayyimmate sayinse qixxaawo isilanchimmate deerra ogimmate maamarranni, fayyimmate uurrinshuwa ogeeyye widoonni qixxaabbino yino.
Fayyimmate handaarinni qajeelte maassantu gedensaanni ikkadimmate keeno fonqolo adhite sa’’a dandiitannokki maassamaano no yinohu qaru dayrekterichi, kunino halaalaancho afansha afidhinokki uurrinshuwara rosansanni ikkinohura fayyimmate rosi isilanchimma deerri fayyimmate uurrinshuwara afanshu fajjo aatenna ikkado egennonna ogimma amddukkinni maassantannori kalaqantannokki gede kaa’lanno yino.
Gobbankera kiirotenni xibbuu ale ikkitannori jawiidi rosu uurrinshuwa Nersingetenni, Faarmaasetenni, Xagisatenni, ilshiishatenninna wolootu fayyimmate ogimma handaarranni calla rosiissannoreeti. Fayyimmate ministeerenna wolootu qeechu noonsa bissa fayyimmate rosi akata harunsite maassantino rosaanonsa hiikko nooro, maa loossanni no? hiitto guma abbitanni no? yitanni harunso assitinotano dayrekterichu xawisino.
Kiirotenni lamala ikkitanno fayyimmate rosi handaarrara fushshinoonnihu isilanchimmate deerri aana Addis Ababu Yuniversite, Jimmu, Dillunna woloottu yuniversituwa mittimmatenni ikkite loossinota qummi assinohu Dr Andualemi, mittichu Nersichi, ilshiishaanchu woy doktorchu hiittooha isilanchimmatenna ikkadimmate deerra wonshinoha ikka noosiro xawisannoho yino. Kalqoomunna gobboomu deerrinni fayyimmate ogimmanni maassantannori bilchaata ikkitanno gede dandiissate fayyimmate ministeere ledo halamatenni ogimma halaalaancho ikkitino doogonna amanyoote amadisiisate loonsanni hee’noonnitano huwachishino.
Fayyimmate rosi isilanchimma deerri bikkaanchi qixxaawasi handaarunni kalaqamanni keeshshinoha isilanchimmate qarra tiranno. Dagoomuno isilanchimma nooseta fayyimmate owaante afi’ra didandiinoommo yitanni duucha yannara kayissanno xa’monna koffeenyi keeshshinoha ikkinotanna isilanchimma noosi roso aate rosu isilanchimma buunxanni amanyooti hee’ra hasiissannotano xawinsoonni.
Bakkalcho Sadaasa 28/ 2014
