Amsaalu Felleqe
Addis Ababa:- Itophiyu qansootinna ilama mootimmannita bay’riidi woshshatto adhite ama gobbansa daatenni gobba gatamarate assitanni noo qeechi galatisiisannonsaha ikkasi IFDR Mootimmate komunikeeshine owaante ministirchi Dr Leggese Tulluhu xawisi.
Itophiyu qansooti, Itophiyu ilamanna hattono gobbanke baxillaano ogimmansanni gobbansa hasidhanno garinni owaattanno gede woshshatto assino.Ministirchu, ‘’Itophiyu qansootinna ilama gobbansa hasidhannonsa yannara dagge leeltino daafira galatu hasiisannonsa’’ yino.
Ministirchu Dr Leggese Tulluhu, be’ro uyno lamalate xawishshinni duuchu dagoomi gaadinni mootimmate olu wolqa diinu anganni wolassitino qooxeessuwara heedhe taxxi yitanno gede gumulo sayinsoonnita qaagiisse; Tigiraayete daga xaano cancishaanchu HWHT qodhaano assoote tiyyidhe giwa noonsata egensiisino.
Baara wido heedhannori Tigiraayete ilama dagate keerira loosa hasiissannonsatano hattonni ministirchu xawishshisinni kaysino. Cancishaanchu HWHT gaamonni horrante keeshshitino qooxeessuwara owaante uytanno uurrinshuwa wirro looso hanaffino.
Laalibelanna Kombolchu quchumma hige horophillu buuwa hanafinotano hattonni. Xaano ikkiro Itophiyu qansooti mimmitu ledo kaa’lamate budensa kaajjishatenni horraano wolquwanni gawajjantino qooxeessuwara irko assitanno gedeno amadisiise woshshatto saysino.
Oneg Shenenna moolletenni gawajjantinota Oromiyu Qoqqowi qooxeessuwarano irko assa hasiissannotano hattonni.
Cancishaano gaamo ledo xaadooshshu noonsa yine huluullammoonnirenna seeru hundaanni hossino manni hajo seeru garinni buunxeenna qorichishantanno gede assate loonsanni hee’noonnitano ministirchu lede qummi assino.
Bakkalcho Sadaasa 28/ 2014
