Abbebech Maatewoos
Addis Ababa:– Abrihooti niwaawete mini haammata cufantino dhagge, jiro kalanqanni doogga baala fannanni waawanchooti yaanni IFDR Xaphoomu ministirchi Dr Abiy Ahmedihu xawisi. Xaphoomu ministirchi Abiy, sa’u Qidaame barra Addis Ababu Quchumira ijaarsinoonniha yannaasincho Abrihooti niwaawete mine maassi’re fani yannara xawisino garinni, niwaawete mini baca cufantino dhagge, jiro kalanqanni doogga baala fannanni waawanchooti.
Jawu qarrinke egennote hoonge ikkinohura, konni korkaatinni mimmitinkewa itammeemmo, jironke diingeemmo, uminke gobba baarigaarrasera soqqamaano ikkine gawajjineemmo. Kuni tidhamannohu kayinni egennotenniiti yino.
Xaphoomu minisitirchi xawishshi garinni, gobba gatamartannoti hattono lophotenna jireenyu widira fushshitannoti egennote. Abrihooti niwaawete minino egenno cu`mishiishatenni egennote hooga qanbarinni fushshitanno doogooti.
Jiroo`mate widira hodhate oosonkera wolaphotenna dhaggete mayimma huwachishate dandiissitanno safo tungirooti. Konnirano qarunni egennote aana illacha assine loosa noonke. Annuwinke ragissinonke jiro oosonkera tareessa dandiinannihu Abrihooti gedeehu niwaawete mini hee`rirooti yino.
Itophiyu giddo tajetenni amadante ilamate reekkama hasiissannonsari noo daafira garunni amadante shiqa hasiisannonsa yinohu Dr Abiy, deerranke afatenni baarigaarranke jiffannonkekki gede assa hasiisannonke. Konnirano Abrihooti gedeeti niwaawete minna sinu quchummara hasiissanno yaanni coy`rino.
Egenno hooga tunsote, tunsote giddo noo manchino heda didandaanno. Konni daafira niwaawete mini tunsichunni fulate jawa kaayyooti yino.
Addis ababu Quchumi Kantiiwitte Dukko Adaanechi Abeebetino ise widoonni, Addis Ababa su`mise gede biifado assineemmo yine e`noommo sheemaati garinni haammata pirojektubba jeefisante owaante aa hanaffino.
Egenno corqine egemmate niwaawete minna jawu qeechi noonsa. Egenno hoogate dhibba hursitanno xagga afantannohuno maaxaaffate giddooti. Ninke maxaaffate qoolla batisate wo`naalleemmo; loonseemmo. Haammata ilamarano caabbicho ikkinoha niwaawete mine owaantete iillinshoommo yitino.
Itophiyanna ilamase baxxannokki bissa kayinni qoolla luqqissanni huntanno. Egenno gibbannorinna ilama huntanno wolqawiinni konninni woyyino looso agara didandiinanni yiteno coydhino.
Addis ababaho 4kiilora 19 kume gishsha baatto aana ijaarsinoonni Abrihooti niwaawete minira 1.1 biiliyoone birri ale fulo assinoonni. Niwaawete mini kalqoomu deerra agadhe minaminohanna Afirikaho afantanno umi tonne niwaawete minna giddonni mitto ikkinotano xawinsoonni.
Shoolu deerrihu niwaawete mini giddosi 1.5 kiilo meetire seendilli noosi. Ledoteno 1.4 miliyoone maaxaaffa dirranni uduunni hattono 240 kume ale woraqatiweelo maxaaffanna 300 kume xiinxallote borro amadino.
Niwaawete mini qansidhanno amuwinna qaaqquullu nabbabbanno kifilla, illetenni la“a dandiitannokkirira Bireeyilete maxaafi shiqisho hattono yannaasinchu kaafteerinna gambooshshu hari noosi.
Bakkalcho Sadaasa 28/ 2014
