Abrahaam Saamueel
Addis Ababa:- Gannu ayyaana harunsitanno ammanaano ayyaana daramaanote, gawajjantinonna heeshshonsa qarru giddo noo daga ledo saaysa hasiissannota babbaxxitinoti amma`note annuwi qaagiissitino. Amma`note annwui Gannu ayyaana lainohunni hawalle keerunni iillishino`ne yite sokka saayissino.
Abba Maatiwoos Albisaanchu Patiriyarke Qaru Liqaane Phaaphaasaati Ze Itophiya Liqee Phaaphaasi Ze Akisume Wecege Ze Menberi Tekilehaymanoti, Gannu ayyaana lainohunni saaysino sokkanni, techo gobbanke qarrunni jifantanni noo yannara haammatu darantinorinna gawajjantinori hattono heeshsho rakkitino daga qooxeessaho baala noota xawisino. Beetelemete Quchumira ilaminohu qaaqqu Kiristoosi insa giddo mitto ikkannohu mereeronsa leelle umisi kulinonte gede, ninkeno basete leelline towaata noonke yino.
Mootichinke ilama sokka la`nummoro mittimma, keeraaanchimma, baxille, wo`ma keerenna Kaaliiqa faarsotenni magansira hattono qarrantino daga mereero leelline mannu qarra beeqqa Kaaliqiwiinni afi`noommo eltonna atoote ikkinota huwanteemmo yino. Beetelemete leeltinoti kaaliiqi ajuuja dhaggete kaaliiqqa calla ikkikkinni, barraho xabbino coommado heeshshonni roso adhine harunsinammosiraati; qoleno tini huwachishankera daggino kaaliiqi sokka sa`ino daafira hawa dinonke yino.
Sokkaano Beetelemete ilamino qaaqqira galatanna magansi’ra shiqishinonte gede ninkeno galatanna heeshshi yine magansi’rate woshshammoommo; Isi kalqete kalaqama angasinni cu`me amadino kaaliiqaati. Saadatenna allaalaasinu ledo hose galino dafira, ninkeno dhuka hooggino daga ledo honse galle hudirinoha itisatenni, goorinoha kassi assatenni, kallinoha uddisiisatenni, dhiwaminohanna usuraminoha xa`matenni dancha lawishsha ikka noonke yee coy`rino.
Itophiyu Kaatoolikete Ammanaano Liqee Phaaphaase Kaardinaali Birhaane Iyyesuus Suraafel isi widoonni, Yesuusi Kiristoosi ilama ayyaana ayirrinseemmo woyte olu giddo saayisse qarrante noo daga ledo hattono tiiu gawajjo iillitinonsa daga, mininsanni darantinore, gawajjo iilitinorenna anuwansanna maatensa reyotenni hooginore qaagatenni insa qarra beeqqatenni saaysa noonke yino.
Baxillu Magani gobbankenna daganke maarosinni lae qarru goofenna keeru noo heeshsho hee`rate bushunna xagarrote coyinni xeertira noonke. Harinshonke kaaliiqi ledo assine, keerunna hagiirru huccaatote giddo noohura jawaante huucci`ra noonke. Konne gumulleemmo woyte Kaaliiqi waajja giddonke hee`ra hasiissannota xawisino.
Tenne yannara gobbankera Itophiyaho keeru booraaweenna ola kaaysirono, mootichu xaate ikkannona yee uurrisanno gedenna wo`ma keere aankera huuci`nanni; keere huntannoriwiinni boonunni, gibbotewiinni, hanqu ayyaaninni xeertira hasiissannonke yino Kardinaal Birhaane Suraafeel.
Itophiyu Wongeelaawuyaanete Abiyaate Kiristiyaane Mittimma Pirezidaantichi Paasteri Tsaadiqu Abdohu hawalle iillishino`ne yee saaysino sokkanni, Yesuusi Kiristoosi ilama ayirrinsannihu cubbu korkaatinni kaaliqinna Manchu beeti mereero kalaqantino diinimma diigate ninke mereero ikkinota huwachishino.
Kiristoosi tenne kalqe day woyte ninke qarranna mitiimma adharati yinohu Paasteri Tsaadiqu, ninkeno ayyaana ayirrinseemmo woyte addi addi qarrinni ayyaana ayirrisa dandiitannokki daganna fiixa dandiineemmo coy baalunkunni irko assatenni ledonsa ikka noonke yee annimate woshshatto assino. Gobbankera sufino keeri daanno gede baalunku uminke qeecha fula hasiissannota qaagiisino.
Bakkalcho Sadaasa 28/ 2014
