Qiddist Gezaheny
Addis Ababa:- Itophiyu Pireesete Uurrinsha gobbate gargarooshshu olantonna adawu wolqa assitinnota dhaggeeffachishshanno sharronna gaado olantote hayyonni dukkisantino millimmo dhaggete tajetenni amaddino yino Mootimmate xaadooshshi owaante ministirchi.
Footote daa’’atto Shoole kiilora Afantanno Itophiyu Pireesete Uurrinshara shoole lamalara keeshshitanno reqecco assitino.
Tenne lamala giddo Arat Kiilote afantanno Itophiyu Pireesete Uurrinsha hoowe giddoonni uurrinshatenni qixxaabbino ‘’Itophiyu Daafira’’ yaanno uminni footote reqeccora qoteho faajjete hasaawano assinoonni.
Hasaawu aana IFDR Mootimmate Komunikeeshine owaante Ministirchi Dr Leggese Tulluhu xawisino garinni, Itophiyu Gargarooshshu Olanto miillanna qoqqowu adawu wolquwa assitino sharro, gaadonna olantote millimmo olanto afantinowa baalankawa afamatenni Itophiyu Pireesete Uurrinsha dhagge tajetenni amadatenni jawa looso loossino yino.
Ministirchu xawishshi garinni, Itophiya gatisate gaadinokkihu dino; gargarooshshehonna adawu wolqara hale ikkitinokkiti Itophiyu daga dino; konneno Itophiyu Pireesete Uurrinsha fototenni dhaggete amaddino yino.
Cancishaano HWHT gaamo Itophiya gashshitino yannara batinye mannoomittete qoosso xiiwo iillishshanni keeshshitino yinohu Dr Leggese, daggino soorronni Meqele e’uhu gedensaanni mulqidhinohu ikka hoogeennansa ninke gashshineemmokki Itophiyi hee’ra dinosi; diigama noosi yite sharrantanni keeshshitino. Konneno Itophiyu Pireesete Uurrinsha dhaggete amadde wortino yino.
Cancishaano HWHT daganke aana loossino miico, iillishshino xiiwo xawinsannihu aliidite yinohu Dr Leggese, Itophiyu balchoomi gobbaanni ikkino assoote iillishshanni keeshshitino. Baxxinohunni qaaqquulle, geerranna amma’note mannoota siyaattanni keeshshitino. Biiliyoonetenni hendanni jajja gawajjitino. Dagate tii’’i aana luphiima xiiwo iillishshino yino. Konne assoote iillishshinohu Amaarunna Affaarete daga haxo heeshshi assate, miinju dhukansa luphi yino deerrinni gawajjate illachishshe assitino assoote ikkasi huwachishino.
Cancishaano HWHT gaamo Itophiya diigate Deddebiti halallinni hanaffe mixidhinota kaysinohu ministirchu, Tigiraayete Rippaablike xintinonso Itophiyu ledo keeshshino yitanno yekkeero noonsankanni. Ikkollana Tigiraayete mootimma safa dandiitannokkita huwatte wolassitanno uurrinsha yitanno hedo amadde Itophiya mulqidhanni gashshitanni keeshshitino. Itophiyu jironna jajja mulqite uminsa jireenya buuxisate looso loossanni keeshshitinota xawisino.
Xaphoomu Ministrchi Dagoomittete Handaari Amaalaanchi Diyaaqoon Daanieel Kibretihuno isi widoonni, Woyyaanete gede Itophiya diingeemmo yitanno wolqa kalaqantannokki gede assa dandiineemmohu iillitino gawajjo qaangummorooti. Mannu massagamannohu siviletenni, budunni, buqqeetenninna amma’note seerinniiti. Mittu manchi dandiiro kuri shoolunkurinni, dandaa hoogiro kayinni mitturinni massagama noosi. Ikkollana la’noommo fotogiraaffa leellishshannohu Woyyaane shoolunku seerinni massagantannokki gaamo ikkansaati.
Itophiyu Tuqu Xaadooshshi Biilloonyi Qaru Daayirekterchi Kalaa Mehammed Idrisihu, Itophiyu Pireesete Uurrinsha 80 diri ale barru barrunkunni gobbanketa poletiku,
dagoomittete, miinjunna xaphooma dhaggese odeessitanni daggino uurrinshaati. Cancishaano HWHT gaamo gargarooshshu olantonke aana gano iillishshuhu gedensaanni barru barrunkuu kalaqantanno ikkito adeessitanni amaddanni keeshshitino. Xa kayinni dhaggenke biso ikkitino hajonke ilama dhagge affanno gede dandiisanno garinni fototenni amadansa naaxxisiisanno looso ikkasi xawisino.
Gargarooshshu ministere dagate xaadooshshi daayirekterchi Koloneel Geetinnet Adaanehuno tenne yannara coy’ranni, Itophiyu Pireesete Uurrinsha 80ki diro ayirrissu yannara konni alba gargarooshshu olanto aana illachishshinota fotote reqecco qixxeessitinonkanni. Layinki yannara dhagge tajetenni amadde reqeccote shiqishansa galatisiisanno assoote ikkasi coy’rino.
Bakkalcho Sadaasa 28/ 2014
