Qiddist Gezaheny
Gobba gatamartanno injoo kalaqate mereersitino wolqa hee’ra hasiissanno daafira togoota Amaalete komishiine uurrisa albillicho gobbate hurrenna ammanamooshshe kalaqqanno yino sidaamu Qoqqowi Pirezidaanti kalaa Desti Ledamohu.
Qoqqowu pirezidaantichi baxxinohunni Bakkalcho Gaazeexi ledo assino hasaawinni; xaa yannara gobbate garinni uurrinsanni hee’noonniti gobboomu amaalete komishiine dagate mereero babbaxxitino la’’o heedhurono gutu hajo aana hasaambe hedotenni sumuu yaa hoogatenni kalaqantanno mitiimma hasaambe tidhate jawa qeecha afidhinota ikkase coy’rino.
Tenne lamala giddo qoqqowoho gobbate yannate hajo aana hasaawa assinoonniha ikkanna, hunaano wolqa gobba diigate fantino ola gobba giddonna gobbaanni noori Itophiyu daga wolootu Afiriku gobbuwa ledo halante assitino sharronni gobba hurtinota kaaysinohu pirezidaantichu; hasaawu aanano xa afi’noonni qeelle dagate beeqqonni afi’noonnita ikkasenni qeellete gedensaanni heedhanno ha’rinsho ma garinni ha’risa hasiissanno yitanno hajo aana qarunni amaalloonnita xawisino.
Aanteteno darantino qansoota irkisa, mittimma kaajjishi’ranna latishsha halashsha dandiinanni hajo aana hasaawa assinoonnita lede xawisino.
Amadisiiseno Yesuusi ilamishshu ayyaana ayirrisate gobbaydinni e’’anno diyaspoora haa’ne wosinsi’rate Sidaamu Qoqqowi garinni addi addi qixxaawo assinanni hee’noonni yee; horo uytanno uurrinshuwa baxxinohunni Hoteella, Baankuwa, daa’’attotenna boohaarshu base, Dikki’nanni uurrinshuwanna babbaxxitino owaante uytanno uurrinshuwa ragi raginsanni uminsa qixxaawo assitanni noota kule, jeefoteno qoqqowo eino diyaspoora gamba assine addi addi qoqqowu hajubba aana hasaawisate mixo amandoonnita qummi assino.
Pirezidaantichu ledotenni ga’a barra ayirrinsannihu ilamishshu ayyaani giwammohu araaramannoha, mittimmanna halamme halashshi’neemmoha, xaphooma danchummanniha hattono gobba lattannohanna lophitannoha, qeellennihanna baxillunniha ikkanno gede halchosi xawise; dagoomu deamikkinni qooxeessisi ga’labbo agadhanni ayirrisa hasiissannota qaagiissino.
jeefoteno wo’manta kiristinnu amma’no harunsaano hawalle yesuusi kiristoosi ilamishshu ayyaanira keerunni iillishi’ne yitanno sokka saysino.
Bakkalcho Sadaasa 28/ 2014
