Amsaalu Felleqe
Sidaamu Dagoomu Qoqqowi Hasiisote Ikkito Borreesso Ejense Loosaasinera loossate wodho lainohunni, BSC hattono handaarunni loonsannire lainohunni mixo qixxeessinanninna gumullanni gara lainohunni haja la’annonsa bissa ledo qinaawatenni hedo cu’mishiishatenna dhuka kalaqate qajeelsha uynoonni.
Ejensete rosunna qajeelshu daayrektoreete daayrektere ikkinohu Kalaa Firew Fangohu xawisino garinni; Ilama, adhama, reyonna tidhamate ledo amadisiisaminohunni hala’lado owaatamaano dagganno uurrinsha ikkasenni eela olluubbate deerrinni hanafe qoqqowu deerrinni handaarunni owaante aatenna buuxote loossa loonsannita coy’rino.
Xaa yannara baxxinohunni loosunni, rosunni, xagisi’rate hattono wolootta hajubbanni baara widira fultanno qansoota paaspoorte fushshi’rate ilamate tajete woraqata xa’minannihura konne assate eela olluubbatenni ilamate tajete woraqata abbiteenna buunxe la’ne Immigireeshiine sonkeenna hakkiinnino Gobbaydi hajo ministere geeshsha marte hajonsa gudde fultannotano xawisino.
Konni kaiminnino Ejense dagganno haammata owaatamaanora hasiissanno owaante olloha rakkino yanna giddo aatenna konneno mixo qixxeessine gumullanni gara lainohunni uurrinshate loosaasinera jawa dhuka kalaqanno qajeelsha uynoonitano egensiisino.
Aantetennino xa qoqqowu deerrinni noo handaaru loosaasinera uynoonniha hasiisote ikkito loossa qajeelsha woraddate tantanora afantanno handaaru ogeeyyera muli barruwa giddo qajeelsha uynannitano hattonni.
Uurrinshate roorenkanni qaaqquullu qoosso agarsiisateno jawa illacha tunge lonsannita coy’rinohu Kalaa Firew; tidhamatenna mite mite yannarano ille doogimaroho tunganni qaaqquulli hajo lainohunni olluubbate borro minnara ayirradu mazigawira borreessiisatenna garunni awuuntanna lophitanno injo kalanqanninsa gede hajo la’annonsa bissa ledo qinaambe loonsannitano lede xawisino.
Sidaamu Dagoomu Qoqqowi Hasiisote Ikkito Borreesso Ejense Riqiwaancho ikkinohu Kalaa Abrahaami Baraarohuno isi widoonni, Ejense dagoomaho uytanno owaante lainohunni babbaxxitino ba’rera huwanyoote kalanqanna ikkitubba borreessate widira lowo kakkaooshshi noota leellishanno deerra iillinoonnita xawisino.
Ejensete hasiisote ikkitubba borreesso Ejense qoqqowu mannu jiro latishshinna dagitte owaante biiro ledo halamatenni BSC garinni uurrinshate mixo qixxeessinanni garanna bikkaanchu maa ikka hasiissannoro, Kaayzenete garinni loossa gumula, hattono mootimmate loosaasine wodhonna loosaasinete amanyoote lainohunni sase qara qara hajubba aana illachishatenni qajeelsha uynoonnita xawisino.
Uurrinsha uytanno owaanteno isilanchonna olloha assatenni owaatamaanote kasseenya lossatenna gumaamma loossa gumulateno jawa illacha tunge loonsanni hee’noonnita lede qummi assino.
Hassiisote ikkito hasi’ni wote calla borreessammannita ikkitukkinni manchi beettira hasiissannota ikkasenni; dagoomu shoolenta hasiisote ikkito ragunni borreessama hasiissannotano Kalaa Abrahaami qummeessino.
Bakkalcho Sadaasa 21 / 2014
