Abbebech Maatewoos
Addis Ababa: Hawaasi Quchumi Gashshooti daanno ayyaana korkaata assatenni islaanchimma noonsa sagaletenna faafiriiku laalcho shiimu waaginni shiqinshanni yannate geeshshi dikko uurrisinota xawinsi. Dikkonna dikkiraano xaadisatenni hasiissannokki waagu lexxonna shiqishate anje garga’ratenni dikko gala`bisate jawu qeechi hee`rannosita ammanne uurrinsoonnita yannate geeshshi dikko Hawaasi Quchumi Gashshooti Kantiiwi Kaa`laanchu Piroofeeserchi Tseggaaye Tukehu lede wolootu quchumu gashshooti loosu sooreeyye maaksanyote barra dooyte towaattino.
Sagalete laalcho hidhitanna hasaawinsoommoti dagoomu kifilla daanno ayyaana korkaata assatenni uurrinsoonniti yannate geeshshi dikko heeshshote wuddinnate ga`labbisate widoonni jawa horo noosete xawisatenni islaanchimma noosi laalcho shiimu waaginni shiqishate loosi kaajje sufa hasiisannota coydhino.
Hawaasi Quchumi Gutu Loosi Maamarra Borro Mini Sooreessi Kalaa Pheexiroos Yohaannisihu, quchumu giddo millissannori dikkiraanote mittimma loosi maamarra babbaxxitino sagalenna faafiriiku laalcho shiimu waaginni shiqishshanno yannate geeshshi dikko daanoha gannu ayyaana korkaata assatenni xaaddara dandiitannota garimale waagu lexxonna laalchu anjeno kalaqantannokki gede luphiima kaa`lo assitannota xawisino.
Woldaamaanueel xawira Hawaasi Quchumi Gashshooti Ijaarira albaanni hige yannate geeshshi dikko giwirinnunnita, faafirikunna saadate laalchoo shiimu waaginni shiqinshanni hee`noonnita xawisinohu Kalaa Pheexiroosi; Hawaasi Quchumi Gashshooti Gutu Loosi Latishshi Borro Mini Daddalunna Dikkote Latishshi Biddishshi hattono Dikkiraanote Mittimma Loosi Maamarra ledo gutunni qixxeessinoonnita ikkase xawisatenni aantete 10nu barri geeshsha keeshshannotano buuxisiisino.
Dikkote sagalete laalcho shiimu waaginni shiqinshanni hee`noonnita xawisinohu Hawaasi Quchumi Daddalunna Dikkote Latishshi Biddishshi Sooreessi Kalaa Haaylu Yetterihu isi widoonni; umono dikko ga`labbisate widoonni luphiima sharro assitanni keeshshitino gutu loosi maamarrara gashshootu daddalu basenna duunkkaana baatooshshiweelo shiqishatenni hattono babbaxxitino irko assatenni ayyaana korkaata assatenni sagalete laalchi waagi garimale lexxannokki gedenna shiqote anje xaaddannokki gede illachunni loonsanni afammannitano lede xawisino.
Hawaasi Quchumi Gashshooti Gutu Loosi Maamarra Boorde Gambisaanchi Kalaa Yooseef Saamueelihu xawishshi garinni; quchumaho millissanno maamarra sagalete laalcho shiimu waaginni shiqishatenni dagooma aarsitanni afantannota waagu lexxo garga’ratenni daga owaatate looso gumulanni no yee; dagoomu sagalete laalcho maamarratewiinni shiimu waaginni dikkiranno gedeno woshshatto shiqishino.Hawaasi Quchumi Gutu Loosi Latishshi Borro Mini Loosaasincho ikkitinoti Dukko Adaanech Urgamotinna kalaa Maatiwoos Dooyyamohu, borrote mini gaashe, sagalete buuro, barbare, bullee, zaayte, quuphenna woleno haammata islaanchimma noonsa giwirinnunna industirete laalcho shiimu waaginni gutu loosi maamarrara shiqishatenni dikko ga`labbisate looso hala`ladunni gumultanni noota xawissino.
Bakkalcho Sadaasa 21 / 2014
