Amsaalu Felleqe
Addis Ababa: ‘’Itophiyunnita gobboomitte mittimmanna ayirrinyese agarsiisate lubbonsa kakkaltino bareeddara galata shiqinshammora hasiisanno’’ yaanni Halantino Mangistuwa Uurrinshara Itophiyu Uurrinshate Soqqamaanchi Ambaasaadderi Taayye AtsiqeSillaasehu huwachishi.
Kalqoomu Itophiyunnihu halantino Diyaaspoori waaxo ‘mitte miliyoone Diyaaspoori ama gobbansa hodhitanno woshshatto hattono waaxote safo lainohunni dagoomitte mashalaqqe hayyonni qixxeessinoonni hasaawano ha’rinsoonni.
Diyaaspooru gobbansa daansano galantannita ikkitinota Ambaasaadderi Taayye xawisino. Itophiyunnita gobboomitte mittimmanna ayirrinye agarsiisate lubbonsa kakkaltino bareeddankera galata shiqinshammora hasiisanno; bareedda jawaachishanna naadano hasiissanno yiino.
‘’Bareedda lowo shetto duqqite, daayno bala dandiite lubbonsa kakkalte gobba hoongeemmokki gede gatissinonke’’ yiinohu Ambaasaadderichu; kuri bareeddankera galatu hasiisannonsata coy’rino.
Diyaaspooru gobbansa daa gobbanke jawa hexxo nooseta leellishannoha ikkasinna Itophiyu qansooti Itophiyu tii’’i agaraano ikkansa kalqete leellinshanniha dancha dago ikkinotano xawisino.
‘’Itophiya gatisatenna kaajjishate hattono Itophiyu daafira hodhaatino’’ yaanniiti Ambaasaadderichu coy’rinohu.
Diyaaspooru gobbansa higge hodhansa xaa yannara Itophiyu aana assinanni hee’noonnita hasiissannokki xiiwonna gobbanke diigate goxxukkinni galtanni hashsha barra loossanni noo wolquwa jawa poletiku sokka afidhinotano qummi assino.
Ha’neemmohu hexxonna halaalu noose Itophiyinna halaale amaddino Itophiyu dagawaati; Itophiyu qarru yannara kaajjite umisenni uurra dandiitanno gobba ikkasenna albillichono suffanno gobba ikkase kalqete loosunni leellinshateeti yiino Ambaasaadderi Taayye.
‘’Itophiyu, wolootu wolquwa hasidhu yannara loobbannosetanna gatamartannoseta; hasidhureno haayikkissannosetano di-ikkitino. Itophiyinke ayirrinyesenna gobboomitte mittimmase agarsiisidhe keeshshitinote; xaano ayirrinysiisse suffannote’’ yaanniiti Ambaasaadderichu lede xawisino.
Itophiyu qansootinna ilama ayirrado woshshatto adhite gobbansa daate assitanno beeqqonni Itophiyu hajo lainohunni yekkeerammeemmokkire ikkanke leellisha agarranninke yee; konninnino duuchunkuri aleenni poletiku sokka sayinseemmo; tini harinsho hurrennite; xa madiissinoonninke madanke hurtanno yannaati yaanniiti coy’rinohu.
‘’Itophiyimma cincatenni duuchankare xeertinse la’’a dandaate ayimmaati; Itophiyimma mulenni hagiidhine hakkiichonni yaandannita di-ikkitino’’ yiino.
Itophiyu cinca burqitannohu Itophiyu qansooti keere hasidhannore ikkansanniiti yee; hiittenneno yanna yannantenni ka’anno hajubba aana hasaawunninna amaalamatenni sufino keere buuxisa hasiissannotano kulino.
Heewontenni roore halama; mimmito xiiwantenni irkisama hasiissannota coy’rinohu Ambaasaadderichu; halammummoro ganteemmo; babbadammummoro kayinni umbeemmo yiino.
Itophiyu daga danchummansanninna shooshanqensanni wosina adhate budinsanni Diyaaspooru miillanke garuni adhite koyissannotano hexxosi xawisino.
‘’Itophiyu qansootinna ilamano Itophiya daggine gobba’ne gatisse’’ yaanniiti Ambaasaadderi Taayye AtsqeSillaasehu lede woshshatto assinohu.
Bakkalcho Sadaasa 21 / 2014
