Amsaalu Felleqe
Addis Ababa: Sidaamu Dagoomu Qoqqowi be’ro barra umi yannara qajeelshino addi wolqa komaando, gano diiggannore hattono addi wolqa maassiisino.
Albita addi wolqa badooshsu uddanono haaro badooshshu uddanonni soorrinoonni. Sidaamu Qoqqowira Shabbadiini woradira Caangete olliira qajeeltanni keeshshitino gano diiggannonna komaando be’ro barra maassiinsoonni.
Qoqqowu pirezidaantichi tenne yannara coy’ranni qoqqowu daga keere, ga’labbonna latishsha buuxisate ragaanni loonsanni hee’noonni loossa gumaamma ikkitinota kule; albillichono qoqqowu ga’labbo teessino garinni suffanno gede gano diiggannonna addi wolqa komaando wolqa kaajjisha hasiissinota coy’rino.
Konni kaiminnino qoqqowoho umikki yannara gano diiggannonna addi wolqa komaando qajeeshine massiinsoonnita xawisino.
Maassantinori ga’labbote wolquwa qoqqowu ga’labbonna keere agaratennino sa’e umonsa yannaasincho hayyonni, rosunna ogimmate dhukinni guuttinore ikkate qixxaabbinore ikka hasiissannonsatano sokkasi sayse; qoqqowohonna qooxeessaho ga’labbo booreessate wo’naaltanno wolquwa heedhuro hasiissanno qaafo adhate qixxaabbinore ikkansano qummi assino.
Qoqqowu Keerunna Ga’labbote Biiro Sooreessi Kalaa Alemaayyehu Ximootiwoosihu isi widoonni; qoqqowoho ga’labbote bissa tantano woyyeessatenna yannaasincho ikkitino hayyonni qajeeltanno gede assitino bissara galata shiqishe; handaarunni afi’nanni hee’noonni gumma gobbankera daggino soorronni afi’noonni kaayyooti yino.
Albillichono qoqqowunnita dagoomu poolise qajeelshate balaxote qixxaawo gundoonnita kule; konnirano baxxinohunni wedellu ga’labbote bissa karsamatenni gobboomitte woshshattora umonsa qixxeessitinore ikka noonsatano sokkasi saysino.
Bakkalcho Sadaasa 21 / 2014
