Abbebech Maatewoos
Fayyimmate ministere assitino woshshatto garinni Amaaru Qoqqowira Aliyye Shawu Zoonera HWHT cancishaano gaamonni diigantino fayyimmate uurrinshuwa giddonni 10 fayyimmate uurrinshuwa wirro gatamaarate yawo adhatenni looso hananfoonnita Sidaamu Qoqqowi Fayyimmate Biiro Sooreette Dr Selaamaawit Mengeshiti xawisino.
Biirote maaneejimentete miilla, qoqqowunniti hallanyu fayyimmate uurrinshuwanna dagoomu riqiwamaano xaginsanni uduunnenna mannimmate kaa`lo amadatenni olunni gawajjantinore Aliyye Shewu Zooneta fayyimmate owaante uynanni uurrinshuwa towaattino.
Gawajjonsa bikka badate Aliyye Shewu Zoone Fayyimmate Biddishshi ledo mashalaqqete soorri’ra assitino. Zoonete diigantinori giddonni 10 fayyimmate mereershuwa owaatate widira higganno gede assate 3 miliyoone birra fushshanno umi dooycho mannihiimmate kaa`lonna xagisate uduunne amadatenni Antisookiya Gemzanna Efraatanna Gidimi woradda martinota Sidaamu Qoqqowi Fayyimmate Biiro Sooreette Dr Selaamaawiti coydhino.
Iillitino gano gutunni beeqqinammora umi kaa`lo hananfoommo yitinoti sooreette; konni garinnino 10 fayyimmate mereershuwa iillitinonsa gawajjo bande hingummo gedensaanni hasiissanno irko assineemmoha ikkanno yitino.
Uurrinshuwa dagoomaho wo`munni wo`ma xagisate owaante aate deerra iillita geeshsha xagisate horonsidhanno uduunne wonshate widoonnino wo`ma yawo adhinoommo yitino sooreette.
Amaaru Qoqqowi Fayyimmate Biiro Layinki Sooreessi Gaashshu Kinduhu, Sidaamu Qoqqowi Fayyimmate Biiro Amaaru Qoqqowira horraano wolqa iillishshino qarra beeqqatenna qoteho uurrate adhitino yawo dhaggete worranni sumudaati yiino.
Bakkalcho Sadaasa 21 / 2014
