Abbebech Maatewoos
Layinki Xaphoomu Ministirenna Gobbayidi Hajo Ministire Kalaa Demmeqe Mekkonninihu, diyaaspooru dagooma adhate amanyooti aana leelle baalante kalqera heedhinanni Itophiyu daga ama gobbata woshshatto bayru ayirrinyinni adhitine dagginoonnihura hawalla keere daggini yiino.
Sanna baala muxxe ooso mittimmanninna bareendenni magadantinose jiffa baala sa`anni kawa iillitinoti ama gobbanke Itophiyu techono bareeddate bue ikkitinota loosunni buuxxinoonni yaatenni kalaa Demmeqe; diyaaspooru dagoomi gobbansa hajo aana massagaano ikkatenni kalqoomu xawira abbooshshensa xawissanni, yoo huuccitanni hattono h a s i i s s a n n o k k i mereero eate assoote efidhe gibbanni keeshshitinota hagiirrunni xawisno.
Baxxinohunnino xaa yannara “Ikkitino” #Nomore yaatenni bareedda annuwinni ragidhinoonni bareendenni hanaffinoonniti mannimmate sharro halaale shokkishshanno kalqe mullitte assitino; yoote sharrantanno daga baalannita bareendenna kakkaooshshe haaroonsitino yaanni xawisino.
PAN Afiriikaanizimera haaro wolqa ikkite Afirika sa`eno kalqete kolidda dagatanna Itophiyu baxillaano kakkaaysino yiinohu ministirchu; gobbate giddo nooti daganke dirrate gobboomu soorrora hale ikke uurratenninna gobbansa wolapho ayirrisiisate hiitte yannannino roore loossanni afantanno yiino.
Gobbansa balaxisse mittimmatenni uurritino qansooti hee`ransa fooliishsho ho`litinonsarinna tii`insa safaminohu ninke badooshshinna uwa giddo ikkite kalaqantino wolquwa mitiimmanke hala`litanno wooyte xu`mitannori, keerinke bati`ranno wooyte shiiltannori hunote wolquwa baca gawajjonna gano iillishshino yaanni qummi assinohu kalaa Demmeqe; cancishaano wolqa kalaqantino gobba Itophiya diigatenna laafisate haaqeensa adda assate baarigaarranke ledo waaxante gumultinokki huno dino; ikkollana di tolinonsa yiino Itophiyu ayirrinyenna naaxxa booreessate dandiitannore baala assitino; tini wolqa horrite amaddino qooxeessuwara suffanno gibbo kaaysatenna heeshshote hexxo tunsiisate haammata mararsitanno assootubba gumultinotano buuxisino.
Kalqe Itophiya bunshetenni kayissanni noo yannara timbiliqqine gobba’ne daatenni noo halaale leellishshinoonninna buuxissinanni daafira Itophiyu galattanno’ne yaanni guwursino.
Bakkalcho Sadaasa 21 / 2014
