Amsaalu Felleqe
Addis Ababa: Cancishanchu HWHT gaamo sharramanni gobbasira kakkalaminohu Xibbuu roorrichi Geetaachew Moreddihu qaaqqi Biiniyami Geetaachohura Addis Ababu quchumu gashshooti hee’ranno mine uyinosi.
Quchumu gashshooti kantiiwa dukko Adaanechi Abeebeti egensiissino garinni; lubbonsa gobbansara yite kakkalantinori olantote miilla maatera hasiissanno irko assate balaxote qixxaawo assinanni hee’noonni.
40 barrira annisi qotira hee’re Itophiyu daafira qasamino qaaqqi Biiniyam Geetaachewunna lossitanno adasi ledo techo xaaddinotano xawisse; ‘’xibbuu roorrichi Geetaachew Moreddahu dhagge bareendete guunxooti’’ yitnoti kantiiwitte; bacu manni bareende loosse gobbate ayirrinyira kakkalantinohura ayirrinyu hasiisannonsa yitino.
Qaaqqu Biiniyami bareendetenni lopha noosi yitinoti kantiiwa Adaanechi; xibbuu roorrichi Geetaachew 40 barra wo’ma qaaqqosi qoteho duqqe diina sharramanni keeshshe wirro harinsoonni gaadinni gobbasira kakkalame agure ha’rino qaaqqosi ninke haa’ne garunni awuunte lossineemmo yitino.
Bareedu xibbuu roorrichi Geetaachew Moredda qaaqqi marqimmasinni la’’a noosikkire laino; Itophiyunniri bareedda ooso gobbansara yite ubbanna qaaqqimmasi illenni laino; buqqeesirano amadino yitino.
Qaaqqu Biiniyaaminna lossitannosirira heedhanno mine saihu 2013M.Dra buuxo assineenna seeri-male doogonni amadantinore agursiinsoonniri gutunni hee’nanni minna giddonni uynoonninsatano xawissino.
Quchumu gashshooti aanteteno qaaqqu Biiniyamira rosu, fayyimmatenna woloottano hasiisannosire injeessannotano kulloonniha ikkanna togoohu danchu assooti qoqqowubbateno gumulamanno yinoonni.
Bakkalcho Sadaasa 14 / 2014
