Abbebech Maatewoos
Marsillaas Gizaachewu (su`mase soorridhinoti) Gojjaametenni Shewaarooobiiti quchumira dagginohu woyyino looso hasidhaannitinka. Loosohono afidhe hallanyu mine kirunni amadde baca dirrara quchumaho heedhino. Kayinni Amaaru qoqqowira hala`latenni Amaaru daga aana shallaggo taashshi`neemmo yitanni keeshshitinoti HWHT hunote gaamo Shewaaroobiiti quchuma hedeweelcho horritu. Marsilaas Gizaachewuti hatte yannara hiikkirano xooqate didandiitino. Canchishaano doogote aana afidhuha baala gananna shaa hanaffu. Noose doorshi minise giddo waalcho cufidhe huucci`ranna ikkannore waajjillunni harunsatella.
Tuqu xaadooshshira macciishshitannotanna cancishaano HWHT shigiggissanno gawajjo iillishshannosekki gede huucci`ra hanaffanno. Waajjitino coy kayinni digatino. Bocaasa 11 hashshihunni 7:00 saatera Marsilaasi galtanno hoowe gangante fansiisidhu gedensaanni minisera timbiliqqi yite e`u. Tenne yannara lowo geeshsha massu; coy baalu tunsise. Hatte yannara “Baatto afoo dadhite egemmiteemme`ero digiweemma” yitanno.
Mini giddora e`unte gede ayimmate xawishshi tage xa`ma hanaffu. Marsilaasinna jaalase waajjitinohura mittu mini giddo noonkanni. Waajjitinoonte dikinseemmo`ne hasi`neemmohu mootimmate qodhaano callaati yite ga`labbisate wo`naaltu. Hoowete giddo baca labballi nookkita buuxxu gedensaanni wole jaallansara sokka sayissu. Xiqqeessubbate gedensaanni Me“enna Gereewo hoowete giddora haadhe abbite gorrite ita hanaffu.
Ittunna aggu gedensaanni “Hanni Waajje” yaanno qaalensano huntu. Marsilaasi lamu halchituse; siattuse; hoowete giddo noo meyaarano labbino gawajjo iillituse. “Umo`ya gatisate wo`naaloommankanni” yitannoti Marsilaasi “Cuuwetenni qassaeranna shitaera qawwe kayissuta asseemmari baeennae sammi yuumma” yite ikkito huwachishshino. “Ane siatate diranteetinkanni daggannohu; tenne yannara meessaneete`ya giwumma” yitanno.
Hedeweelcho hoowete giddo mittu labbaa beetti noonkanni; angasi aana noo irra Itophiyu baandeeraatinkanni. Te yannara angasi baattote aana diriirsi yite butuchite tuggusi. Beettu shetto la`niro wi`lishiishshannote; xissiissanno. Itophiyanna Itophiyimma lawino coy baalu dicoommannonsa. Base baalate cancishaano HWHT nna shene baandeera suttanni noonka yite hatte yannara noo ikkito qaagganno.
“Insa xa hadhino; ani kayinni goxicho goxa didandoomma. Haaqeetennino addinnino leeltannoe; yaachishannoe. Xaa geeshsha fooliishshira didandoomma. Mule`ya wolu manni hee`reenna nafa insa noohalla lawannoe. Hattoonni godo`litaenkunni shiteemme`ero woyyannoenkanni. Coyibba baala wolqa`ya aleenni ikkituta shiiyye“e yee huucci`rummansa. Lamalu mitteenni siattinoe; barrnni mittu beetti sase hige daaye siatinoe. Hiikkuno ale umo`ya giweemma gede assitinoe. Manchu akati dinonsareeti; mo“ichu gedeeti kakkachimmansa” Yitino Marsilaasi.
Marsilaasi cancishaano HWHT quchuma diigansanninna mininni fultara fajjitinosekkihura 10 barra ale dixagisidhino. Taraabbanno xissora reqicci yaano ikko hasi`nannikki godowishshi kalaqaminotanna kalaqaminokkita buuxa didandiitino. Kayinni yitanno Marsilaasi ‘Anera wolqa dinoe kaaliiqi loosinsata baattonsa”. Kuri mannooti Itophiya gibburono gobba diiga kayinni didandiitanno. Tenne afa noonsa. Tennerano Itoophiyu daga baalanti halama noonsa yitannoti jeefote sokkaseeti.
Bakkalcho Sadaasa 14 / 2014
