Yaareed Geetaachew
Addis Ababa: Xaphoomu ministirchi Dr Abiy Ahmedihu Diyaasporu miillanna Itophiyu baxillaano tayxeeha Gannunna Cuuammete ayyaana gobbansara dagge sayissanno gede ayirrado woshshatto assino kaiminni xaa yannara baara widoonni heedhannori Itophiyu qansootinna ilama woshshatto adhite gobbansara daate kakkaooshshinsa luphiima ikkinota xawinsoonni.
Ayirradu xaphoomu ministirchi qansootaho assino woshshatto addinta naandannita ikkinota Diyaasporu miili Atleet Belayneh Diinsamohu coyi’ranno.
Galchimi gobbuwa Itophiyu keere afidhe heedhara hasidhannokkihura kaphunni ‘’Itophiyaho hee’rano didandiinanni; HWHT Addis Ababu quchuma doyisse amadinohura keeru dinoowaati, Itophiyaho heedhinaniri Ameerikunna woloottu gobbuwa qansootino agurtine fulle’’ yitanni yanna baala xawishsha fushshitanni noo yannara; olu basera hee’re Diyaasporu miilla ayyaanna gobbansara sayissanno gede sokka sayisasi diinna kaphunni dudubbannohunna baattote aana noo halaali kayinni babbaxxinoha ikkasi leellishannoho yino.
Konninnino duuchinkera lowonta tashshi yinonke yiinohu Atileeti Belayneh; baxxinohunni Itophiyu pireesete uurrinsha, Bakkalcho gaazeexira xawisino garinni; ayirrado woshshato adhite dagganno Diyaaspori kiiro luphiima ikkasenni miteekke Itophiyu horophilu doogora hodhisate wolqate aleenni ikkinorinna hakkiicho kayinni fajjo xa’midhe rahotenni fajjo afi’rate ragaanni foonqe kalaqantara dandiitannohu gobbaanni gobbansara e’anno gede doogga injeessate ragaanni qarru nookkita coyi’rino.
Wole ragaannino Awuroppu haaru diri eanni nooha ikkasinninna wolqate aleenni ikkino korkaatinni ikka hoogiro qansootunna Itophiyu baxillaanno tayxeeha Kiristoosi ilama ayyaana Ganna hattono Cuuammete ayyaana 1 miiliyone Itophiyu qansootinna mittu mittunku ledonsa wole gobba qansoota haadhe dagganno gede koyinsoonni kaiminni; mixote aleenni ikkino manni daara dandaannotano Diyaasporu qineessaanchi Atileeti Belayneh Diinsamohu Masachutes Bosteni quchuminni xawisino.
Xaa yannarano Itophiyu hanaffinohu xiiwo ikkitonkena ‘’NoMore’’ yaanno gaado wo’manti Afriku gobbuwa kadote gashshooti ikkonkena yaatenni koliddu baalunku Ameerikunna mite mite galchimi gobbuwa koliddu aana assitanni noo kadonna xiiwo tiyyidhe giwate dira harissanni afantanno.
Lawanno dira aantetennino kaajjinshe sufinsanniha ikkanno; yinohu Atileeti Belayneh; Galchimi gobbuwa koliddu umonsa dandiitannokkinna wolaphitannokki assate wo’naalshinsa hee’noommohu 22ki sanira hendannikkireeti; konninnino assootinsa lowonta saalfachishannoho yino.
Itophiyu manni halaale amade sharramanni noo daafira galchimi gobbuwa poletiku hasattonsanni gobbankera laafanna insara calla soqqantanni heedhanno mootimma kalaqate hedde xiiwo assitanni nooha ikkirono gobbate giddono ikko gobbaanni hee’noommo qansooti mittimmanke kaajjishi’ne halaale amande sharrammummoro koliddu baalu waatinkera ikkitanni noohura qeelle ninketa ikkitanno yaanniiti coyi’rinohu.
Diyaasporu xaa yannara dagatenni ammanamooshshe afidhe doorantino mootimma ledo halamatenni poletikaho ikkiikkinni gobbate daafira sharrantanni noota qummi assinohu Atileet Belayneh; sharro kaajjite suffannotano lede xawisino.
Atileet Belayineh Diinsamohu ganna ayirrisate baxxino korkaatinni Itophiya daa hoogirono Minaamasi ledo darantino maatera 1500 Ameeriku dolaare soyinota kulino.
Bakkalcho Sadaasa 14 / 2014
