Abbebech Maatewoos
Addis Ababa: Halantino mootimmubba uurrinsha mannihimmate qoosso amaale mini Tigirayete hajora amadinota hasiissannokki harinsho uurrisa hasiisannosita xaphoomu ministeerchi borro mini huwachishi.
Xaphoomu ministirchi borro mini pireesi sekreetaariyaate kalqoomu xaadooshshinna tuqu xaadooshshi sooreette Billeene Siyyumiti yannate hajo aana uytino xawishshinni egensiissino garinni, halantino mootimmubba mannihimmate qoosso amaale mini Tigirayete qoqqowira mannihimmate xiiwo hajo lainohunni hanaffino harinsho hasiissannokkite.
Amaalete mini Tigirayete mannihimmate qoosso xiiwo yaatenni amadinota ledote hasaawa yiino harinsho uurrisa noosi. Amaalete mini Affaaretenna Amaaru qoqqowubbara gumulantino haammata mannihimmate qoosso xiiwora illacha aa noosi yitino.
Amaalete mini qarunni galchimi gobbuwa mittimma miila gobbuwanni qixxaabbino sanade aana Itophiyu daafira amaalino. Itophiyu hajo aana assino gambooshshi mannihimmate qoosso xiiwo buuxate su`minni polotiku ajanda gumulsiinsanniha ikke muli yanna giddo mootimmatenni adhamooshshe diafi`rino yite xawissino.
Mitu mitu yitanno garinni Itophiyu gobbasera mannihimmate qoosso ayirritara hasatto noosekkihura di-ikkino; sayinsoonni gumulo adhitinokkihu. Roorenkanni harinsho umisenni gara ikkitinokkihuraati yite coydhino.
Halantino Mootimmubba Uurrinsha mannihimmate qoosso jawiidi komishiinere borro mininna Itophiyu mannihimmate qoosso komishiine loossinota gutu rippoorte amaddinota hunate harinsho harunsino yitino. Gambooshsheho haaro mannihimmate qoosso buuxo assinanni gede yaasino digaraho yitino.
Alba assinoonnitanna Itophiyu mannihimmate qoosso komishiinenna Halantino Mootimmuwa mannihimmate qoosso jawiidi komishiinere borro mini gutunni assitino mannihimmate qoosso xiiwo buuxo harinsho lainohunni mootimma coye injeessitinota qummeessitinoti Billeene, rippoortenniha mito mito guma mootimma adhite aantete loossa faajje assitinota buuxisiissino.
Baxxinohunnino mannihimmate qoosso xiiwo buuxo harunse mootimmate deerrinni ministirootu gaamo uurrinsoonnitano xawissino. Rippoorte harunsite hanaffino loossa heedheennanni, haaro mannihimmate xiiwo buuxo Itophiyaho harisate ka“a gara ikkitinokkita coydhino.
Uurrinshuwa gutunni assitino mannihimmate qoosso xiiwo buuxo aana Itophiyaho mitteenni sircho gundoonnikkita hattono hude olu hajora hossinokkita buunxoonni. Tenne buuxo assine hee`neennanni labbino buuxo assate hasatto leellisha kalqoomu seerano ayirrissanokki harinshooti yitino.
Halantino Mootimmubba mannihimmate qoosso amaale mini umihunni harinsoonni buuxora afamishsha aara hasiisanno. Gutu mannihimmate qoosso xiiwo buuxo harinshoranna buuxotenni shiqqino amaalete hedo loosu aana hosiisate mootimma hanaffino wo`naalsha kaajjisha hasiissannosi yite hedisiissino. Wole widoonni HWHT gumulino horro korkaatinni gawajjo iillitinonsa Amaarunna Affaarete qoqqowubbara hasiissanno kaa`lo shiqqanni noota coydhino.
Lawishshaho Aliyye Wollo zoonera afantanno Woldiyu, Qobbo Mersa qooxeessuwara mootimma 10316 kuntaala sagale iillishshinotanna ledoteno 22 kuntaala babbaxxitino sagale Gaashena, Laaliibela, Waadilanna Laasta woradda sonkoonnita xawissino.
Bakkalcho Sadaasa 14 / 2014
