Abbebech Maatewoos
Afaaretenna Amaaru qoqqowubbara diigantinore safote latishshuwa gatamaaratenna darantino daga wirro uurrisate yawo baalinkete yaatenni Sidaamu qoqqowi pirezidaante kalaa Desta Ledamohu xawisi.
Qoqqowubbate ledote kaa`lo assate jiro gamba assinanni afammeemmono yiinonohu Kalaa Desta Ledamohu, cancishaano gaamonni gawajjo iillitinonsare Affaarenna Amaaru qoqqowubba wirro uurrisate baalunku Itophiyu qansichi yawooti yiino.
Ganantino qooxeessuwa Itophiyu giddo afantannore ikkansa gede, Itophiyu qansichi baalunku konne qarra tirannoha ikka noosi yaatenni huwachishino.
Gobbate gede xaaddinonketa jifo sa“ate baalunku noosi wolqa baala horonsi`ratenni halama hasiissannosi yaatenni qummi assino pirezidaantichu.
Iillitino gawajjo kiisatenna daramaano wirro uurrisate yawo baalanka qoqqowo la`anno yiinohu kalaa Desta, Sidaamu qoqqowino kunni albaanni mittimmasi leellishate Baahir-Daaretenna Semeru quchummara leellatenni woxunna hattono danu kaa`lo assinota qummeesse; xaano ledote irko assate jiro gamba assinanni afammeemmo. Muli yanna giddo Amaaru qoqqowira afamme ledote kaa`lo assineemmono yiino.
Pirezidaantichu egensiisino garinni, cancishaanu HWHT horre amade keeshshino Amaarunna Affaarete qoqqowubbara mannu aana assinannikkita lowo geeshsha shagiggissanno barshe gumulino. Jajju aanano mararsitanno ganonna mulqa iillishshino.
Cancishaano gaamo bunshensa aana kakkachimma lexxite Amaarunna Affaarete qoqqowubbara keeraano doddoltino. Mannu lubbo qola hoongummorono, mittimmatenni uurrinummoro kayinni ba`ino jiro qola dihoongeemmo yaatenni coy`rino.
Amadisiiseno tii“u gaadi korkaatinni Aliyye Itophiyira irshu loosi loosaminokki qooxeessuwa noota coy’rinohu kalaa Desta, laalchu anje kalaqantannokki gede Sidaamu qoqqowira lattate kaayyo afidhino qooxeessuwa baala gidunni diwantanno gede assinoonnita coy`rino.
Qoqqowu giddo rosaminokkiha arri gorsa horonsi’ra rosiisatenni qamade haal`ladu garinni lattanni afantanno. Qoqqowu mootimma luphiima illacha aatenni laalchu anjenna waagu lexxo qarri kalaqamannokki gedeno loossanni afantanno yiino.
Jeefoteno Pirezidaantichu, cancishaano gaamo hunate hananfoonni oli dijeefino. Cancishaano gaamo horonsidhe uminsa hasatto gumulate hasidhannori gobbaydi wolquwa xaano kalaqqanno xiiwo maa ikkitara dandiitannoro faajjetenni dianfoonni. Ikkinohurano Itophiyu daga afi`noonni qeellenni deammummokkinni ga`labbote wolqanke kaajjishatenna gargartote olanto qajeelsatenna tantanate yawo noonke. Dagano hale ikkite mooraale aatenni kunni albinte gede kaa`lonsa sufa hasiissannonsa yaattenni sokka saysino.
Bakkalcho Sadaasa 14 / 2014
