Yaareed Geetachew
Olu wolqa Itaamaazhoore massagaanchi Jeneraal Birihaanu Julihu, Gaashenaho leelle qeelle assitu olanto ledo galatu qixxaawo mittimma saysino. Jeneraal Birihaanu “Gaasayinni Istayshi geeshsha” yaannohunni Gaashenu olu basera qixxeessinoonni olanto galatate qixxaawo aana coy’rino garinni; olu hanafara albaanni qeenfatanni, hecheemmo kadanninna olantote daa’’atto leellishanni keeshshi horraanchu junta, aguri galfati yineenna macciishsha hoogasinni qoesi miqichi hiiqqameenna lame lamala giddo 500km xooqanna shinoonni yiino.
Juntu adhinoonnisi olantote qaafonni roore wolqasi reeshsha, madaanonna qafadamaano ikkite qodhosi diiganteenna shiimu giggili soqqamaanosi lekka fushshinke yite xooqqate gadachantino. Jeneraalichu, Woyyaane kakkachite e’ino olinna sainohunni rosa hoogansanni 500km ganamenna xooqe jajjasino giggishshanni, techo geeshsha xinqine gundoommokki qafadamaano agurte Meqele e’u gedensaanni hayyote shigidiixxa assoommo yaatenni; daga awaawurara wo’naalanno yiino.
Jeneraalichu yiino garinni, diinu balaxe qoesi miqicho hiiqqaminohu Kaasagista olu battalara Miille amadara hedi woyte noo Olanto shoole ganantu gedensaanniiti. Miille muratenni Itophiyu Goowa murate dirino “Army shoole” qoensa miqichi ganamita cancishaanote gaamo olanto wo’munni wo’ma billaallite fultino yaanni Jeneraal Birihaanu Julihu coy’rino.
“Army Arat” (olanto shoole)te aana afi’noonni qeelle halashshatenni; “Army sost” (olanto sase) tayinsate looso loonsoonnita xawise; olanto sase Harbu aana murre billaallinse hunnoommo yaatenni buuxisino. Miqichisi hiiqqamino Junti uurra hoogino daafira 500km lame lamala giddo xooqanna barbadeessine yaanno sioole eessinoonni yiino.
Juntu Tigirayete daga doganni no; halaale coy’rate tuqu xaadooshshira dikullanni ikkinniina, gudisiissino Tigirayete qaaqquulli, geerrunna wedellu kiiro kulle digundannite yiino jeneraal Birihaanu. 80% ikkitanno wolqa gude, reeshshanna madaano asse; 20% ikkitannokki giggilo adhe uminkenni hayyote shigidiixxa assine fulloommo yaatenni juntu daga awaawurate wo’naalanni nootano lede xawisino.
Aliyye galchimi bareedda kayinni konni dhaggetenna gobba gatisate barri, yannanna sanu ola bacu qarri giddo noosihona konne qarra dandiitine sa’ine qeelletenni guddinoonni daafira galatu hasiisanno’ne; dhagge naqqassanno’ne yiino.
Aliyye galchimi olantote miilla hawalle qeellete gedensaanni xaadate iillishinke yiinohu Jeneraal Birihaanu, jawu ayyaaninke kayinni gannaho; jawiidiha mini looso gundummo gedensaanni mittimma hagiidhineemmo yiino.
Bakkalcho Sadaasa 14 / 2014
