Amsaalu Felleqe
Addis Ababa:- Oromote Abbaa Gadooti mittimma Xaphoomu Ministirchi Dr Abiy Ahmedihura ‘’Abbichu Abbaa Biyya’’ yaannoha Gadunnihu bareendete su’ma su’mitu.
Oromote Abbaa Gadooti mittimma Xaphoomu ministirchi Dr Abiy Ahmedihu olu basera gaade olanto massagatenni maareekkisiisino qeellera ‘’Abbichu Abbaa Biyya’’ yaannoha Gadunniha bareendete su’ma su’mitinota egensiissu.
Cancishaanchu HWHT ledo halaminohu hiikkuno Oromote diinaati yitinoti mittimma sa’u muli barruwa giddo Kerreyyu Abbaa Gada shaatenni diinu iillishino barshe tiyyidhe gibbannotano mittimma xawissino.
Mittimmate borreessaanchinna Tullamu Abbaa Gadi Goowani Hoolahu xawisino garinni; Oromote daga be’ronte gede techono woloottu roduuwu Itophiyu daga ledo gobbate mittimmara jawa qeecha fultanni no.
‘’Diinu, ‘gobba diigantu’ yee agaranna Xaphoomu ministirchinke kayinni olu basera gaadatenni olanto massagatenni daga gobba ba’anno yite bidhattote giddo ubbannokki assatenni sae gobbate hegeraamimma buuxissanno qeelle maareekkantanno gede assino’’ yino.
Meecca Oromo Abbaa Gadinna mittimmate miili Abbaa Gadu Worqineh Tereessahuno isi widoonni; Xaphoomu ministirchi massagonni maareekkantino qeelle wo’mante Itophiyu qansooti qeelle ikkitinota kulino.
‘’Qeelle giddoydinna gobbaydi diinna gobbanke aana ga’nitino gano diigginoha ikkatennino sa’e hananfoonniha gobba diigamatenni gatisate tiiu gaado harancho yanna giddo gumulate jawa kakkaooshshe amaddinote’’ yino.
Xaphoomu ministirchi gobba gatisate bayi’riidi gashshootu minisinni fule olu basera gaade olanto massagatenni diinu aana adhinanni hee’noonni qeellenna bareendera Oromote Abbaa Gadooti mittimma naandensanna galata shiqishshinota xawissino.
‘’Mittimma Oromote bareedi su’mi Moggaasu garinni Xaphoomu ministirchira ‘Abbichu Abbaa Biyya’ yaannoha Gadu su’ma su’mino’’ yitanni fajje assitino. ‘’Cancishaanchu HWHT ledo halantinoti Shene gaamono Oromote diinaati’’ yaatenni mittimma uuurrinshano xawissino.
Oromote daga mittimmanna hasatto gobbaanni ikkino garinni diinnate ledo dirantinori Shene qodhaano angansa mootimmatenna Abbaa Gadootaho uytanno gedeno mittimma woshshatto assitino.
Afran Qallo Abbaa Gadi Shemiili Ahmedihuno isi widoonni; ‘’cancishaano HWHT nna Shenehu hunote ganonsanni dogante dubbo e’inori Oromote ooso heedhuro higge gobbate gargarooshshu olanto ledo ikkatenni gobbanke diigara mixi’rino diina maxara noonsa’’ yino.
‘’Cancishaanchu HWHT ledo waaxaminohu hiikkuno Oromote diinaati; Oromote daga seeda sannara kakkalantanni keeshshitino illacha qaccera qolatenni diinnate ledo halama shollinyeho’’ yinohu kayinni Oodu Rooba Siiko Mendo Abbaa Gadi Ali Mehaammed Suruuriho.
‘’Kerreyyu Abbaa Gadi shaatenni iillinshoonni barshe Oromote daga shollishate illachinshoonni diinu assoote ikkinohura farco hasi’neemmo’’ yitino. Kerreyyu Abbaa Gadi aana iillinshoonni hilo tiyyidhe giwatenni; jaddo loossino bissa rahotenni seeru hundaanni hossanno gede huwachishinohu kayinni Booranu Abbaa Gadi Kura Jaarsoho.
Bakkalcho Sadaasa 7/ 2014
